होळीच्या दुसऱ्या दिवशी आज अवघा महाराष्ट्र रंगांच्या उत्सवात न्हाऊन निघाला आहे. धुलिवंदनाचा सण आज राज्यभर मोठ्या उत्साहात साजरा करण्यात येत असून, शहरांपासून ग्रामीण भागापर्यंत आनंदाची उधळण पाहायला मिळत आहे. विशेष म्हणजे, यंदा सामान्यांसोबतच राजकीय दिग्गजही आपल्या कार्यकर्त्यांच्या रंगात रंगल्याचे विलोभनीय चित्र पाहायला मिळाले. राजकारणातील गट-तट विसरून अनेक नेत्यांनी आज कार्यकर्त्यांसोबत धुळवड साजरी केली. मुंबई, पुणे, नाशिक, नागपूर, छत्रपती संभाजीनगर आणि कोल्हापूर यांसारख्या प्रमुख शहरांमध्ये धुलिवंदनाचा उत्साह शिगेला पोहोचला होता. गृहनिर्माण सोसायट्या आणि सार्वजनिक चौकांमध्ये ‘बुरा ना मानो होली है’च्या घोषणा देत तरुणाईने डीजेच्या तालावर ठेका धरला. अनेक ठिकाणी पारंपरिक ढोल-ताशांच्या गजरात गुलाल उधळत मिरवणुका काढण्यात आल्या. महिला आणि मुलांनीही या रंगोत्सवात उत्स्फूर्त सहभाग नोंदवला.
रावसाहेब दानवेंची खंजिरी आणि कलर सिलेंडर माजी केंद्रीय मंत्री रावसाहेब दानवे यांनी भोकरदनमध्ये चक्क सिलेंडर हातात घेऊन कार्यकर्त्यांवर रंगांची फवारणी केली. एका कार्यकर्त्याने त्यांच्यासाठी गाणं गायलं असता, दानवे यांनीही खंजिरी वाजवत त्याला साथ दिली. भास्कर जाधवांनी नाचवली पालखी कोकणात सिमगा उत्सवाचा वेगळाच उत्साह असतो. आमदार भास्कर जाधव यांनी चिपळूणच्या तुरंबव गावी ग्रामदैवताची पालखी खांद्यावर घेऊन पारंपरिक नृत्य केले. खोतकरांकडून नैसर्गिक रंगांची उधळण जालन्यात माजी मंत्री अर्जुन खोतकर यांनी फुलांपासून तयार केलेल्या नैसर्गिक रंगांनी कार्यकर्त्यांसोबत सण साजरा केला, तर भोकरदनमध्ये आमदार संतोष दानवे यांनीही कार्यकर्त्यांच्या गराड्यात रंगोत्सव साजरा केला. संभाजीनगरमध्ये अंबादास दानवे यांनी कार्यकर्त्यांसोबत होळी साजरी केली. नागपूरची ‘लठ्ठमार’ होळी नागपुरातील आनंदम आणि वृंदावन सोसायटीत मथुरा-वृंदावनच्या धर्तीवर ‘लठ्ठमार’ होळी खेळण्यात आली. महिलांनी हातात काठ्या घेऊन आणि पुरुषांनी ढाली (झाल) घेऊन खेळलेली ही होळी आकर्षणाचे केंद्र ठरली. सिंधुदुर्गात दीड दिवसांची धुळवड सिंधुदुर्गातील कुडाळमध्ये दीड दिवसांच्या धुलिवंदनाची परंपरा जोशात पाहायला मिळाली. राजकीय नेत्यांपासून लहानांपर्यंत सर्वच डीजेच्या तालावर थिरकले. पुण्यात मातीशी नातं सांगणारी ‘चिखल-होळी’ पुणे शहरात शिक्षणासाठी आलेल्या ग्रामीण भागातील विद्यार्थ्यांनी एका वेगळ्याच पद्धतीने सण साजरा केला. “मातीशी आमचं घट्ट नातं आहे,” असे सांगत या विद्यार्थी-विद्यार्थिनींनी चिखलात मनसोक्त लोळून धुलिवंदनाचा आनंद लुटला. रंगांपेक्षाही मातीच्या सुगंधात न्हाऊन निघत या तरुणाईने ‘चिखल-राडा’ केला. सणासोबत चंद्रग्रहणही दरम्यान, आज 3 मार्च रोजी चंद्रग्रहण आहे. त्यामुळे धूलिवंदन साजरा करता येणार की नाही, रंग खेळणे जमणार की नाही, याबद्दल नाना शंका कुशंका व्यक्त केल्या जात होत्या. मात्र, चंद्रग्रहण असूनही याच दिवशी धूलिवंदनाचा दिवस साजरा करता येईल. रंग खेळता येईल, अशी माहिती पंचांगकर्ते मोहन दाते यांनी दिली.
