महावितरणची धडाकेबाज जनजागृती रॅली
सुरेश पाचभाई मारेगाव
मारेगाव येथे आज ४ मार्च रोजी लाईनमन दिवस मोठ्या उत्साहात साजरा करण्यात आला. महाराष्ट्र राज्य वीज वितरण कंपनी मर्यादित (महावितरण) कार्यालयात सकाळी विद्युत सुरक्षा प्रतिज्ञा घेऊन कार्यक्रमाची दमदार सुरुवात झाली.
सकाळी १० वाजता तहसीलदार उत्तमराव निलावाड यांच्या हस्ते बाईक रॅलीला हिरवा झेंडा दाखविण्यात आला. ही रॅली उपविभागीय महावितरण कार्यालयापासून सुरू होऊन आंबेडकर चौक, नगरपंचायत चौक, मार्डी चौक, राष्ट्रीय विद्यालय चौक, माधव नगरी व पोलीस स्टेशन मार्गे पुन्हा महावितरण कार्यालयात दाखल झाली.
या रॅलीचा मुख्य उद्देश वीज ग्राहकांमध्ये विद्युत सुरक्षेबाबत व्यापक जनजागृती करणे हा होता. शहरातून निघालेल्या या रॅलीने नागरिकांचे लक्ष वेधून घेतले.
रॅलीनंतर उपकार्यकारी अभियंता शामसुंदर कुर्रा यांच्या हस्ते सर्व कर्मचारीवृंदांचा सत्कार करण्यात आला. लाईनमन दिवसाचे औचित्य साधत सर्व वीज वितरण अभियंत्यांनी लाईनमन गणवेश परिधान करून त्यांच्या कार्याबद्दल आदर व्यक्त केला.
महावितरण कार्यालयात मनोरंजनासाठी कॅरम, बॅडमिंटन व इतर खेळांचे आयोजन करण्यात आले. सायंकाळी पाच वाजता कार्यालय परिसरात सर्व अधिकारी व कर्मचाऱ्यांच्या हस्ते वृक्षारोपण करण्यात आले.
लाईनमन हे वीज वितरण व्यवस्थेचे खरे शिल्पकार असून कोणत्याही संकटात जीव धोक्यात घालून सेवा देतात.
त्यांच्या कार्याचा गौरव करत मारेगाव महावितरणने साजरा केलेला हा लाईनमन दिवस प्रेरणादायी ठरला.
