बातमी ऐका (Marathi Voice Reader)
होळीच्या उत्साहाला नागपूरमध्ये एका घटनेमुळे गालबोट लागले आहे. खेळता खेळता अंगावर रंग उडवला या क्षुल्लक कारणावरून संतप्त झालेल्या आजीने आपल्या 4 वर्षांच्या नातवावर उकळते पाणी ओतल्याची खळबळजनक घटना कोराडी परिसरात घडली आहे. यात चिमुकला 45 टक्के भाजला असून त्याच्यावर खाजगी रुग्णालयात उपचार सुरू आहेत. ही संपूर्ण घटना सीसीटीव्ही कॅमेऱ्यात कैद झाली आहे. मिळालेल्या माहितीनुसार, कोराडी येथील रहिवासी 4 वर्षीय ओम हरीश वांगे हा घराबाहेर पिचकारीने होळी खेळत होता. त्याचवेळी त्याची आजी सिंधू ठाकरे या होळीच्या लाकडावर तापवलेले गरम पाणी बादलीत भरून घराकडे नेत होत्या. ओम खेळत असताना त्याने सहजपणे पिचकारीतील रंग आजीच्या अंगावर उडवला. यामुळे सिंधू ठाकरे यांचा संयम सुटला आणि त्यांनी क्षणाचाही विचार न करता हातातील उकळत्या पाण्याची बादली थेट नातवाच्या अंगावर रिकामी केली. 45 टक्के भाजला, प्रकृती गंभीर गरम पाणी अंगावर पडताच ओम वेदनेने विव्हळू लागला. पाण्याचा चटका इतका तीव्र होता की, त्याचा कमरेखालचा भाग गंभीररीत्या भाजला आहे. मुलाचा आरडाओरडा ऐकून कुटुंबातील सदस्य बाहेर धावून आले. जखमी ओमला तातडीने जवळच्या खाजगी रुग्णालयात दाखल करण्यात आले. डॉक्टरांच्या मते, तो सुमारे 45 टक्के भाजला असून त्याची प्रकृती गंभीर आहे. ओमचे वडील वेकोलीमध्ये कार्यरत आहेत. सीसीटीव्ही फुटेज व्हायरल ही हृदयद्रावक घटना परिसरातील एका सीसीटीव्ही कॅमेऱ्यात कैद झाली आहे. व्हिडिओमध्ये दिसत आहे की, रागाच्या भरात पाणी ओतल्यानंतर आजीने पुन्हा नातीच्या हातातील थंड पाण्याची बादली घेऊन ती ओमवर ओतली. मात्र, तोपर्यंत ओम गंभीर भाजला गेला होता. पोलिस तपास सुरू घटनेची माहिती मिळताच कोराडी पोलिसांनी घटनास्थळी धाव घेतली. व्हायरल सीसीटीव्ही फुटेज आणि प्रत्यक्षदर्शींच्या जबाबाच्या आधारे पोलिसांनी या प्रकरणाचा तपास सुरू केला आहे. आपल्याच नातवाबाबत आजीने दाखवलेल्या या क्रूरतेमुळे परिसरात हळहळ व्यक्त केली जात आहे.
