जामखेडमध्ये टोळीयुद्धाचा भडका:कुख्यात गुंड सागर मोहळकरवर गोळीबार, 4 गोळ्या लागल्याने प्रकृती चिंताजनक

शहरातील नुरानी कॉलनी परिसरात बुधवारी रात्री साडेसातच्या सुमारास कुख्यात गुंड सागर किसन मोहळकर याच्यावर अज्ञातांनी गोळीबार केला. या भीषण हल्ल्यात मोहळकरला 4 गोळ्या लागल्या असून, त्याची प्रकृती अत्यंत चिंताजनक आहे. प्राथमिक उपचारानंतर त्याला तातडीने पुण्याला हलवण्यात आले आहे. मिळालेल्या माहितीनुसार, सागर मोहळकर बुधवारी सायंकाळी साडेसात ते पावणेआठच्या सुमारास नुरानी कॉलनी रस्त्यावरून जात होता. यावेळी दबा धरून बसलेल्या हल्लेखोरांनी अचानक त्याच्यावर गावठी कट्ट्यातून गोळीबार सुरू केला. हल्लेखोरांनी एकूण 5 ते 6 राऊंड फायर केले. गोळ्या लागताच मोहळकर रक्ताच्या थारोळ्यात रस्त्यावर कोसळला. गोळीबाराच्या आवाजाने परिसरात एकच खळबळ उडाली आणि नागरिकांची पळापळ झाली. या गोंधळाचा फायदा घेत हल्लेखोर दुचाकीवरून पसार झाले. सागर मोहळकर हा जामखेडमधील रेकॉर्डवरील गुन्हेगार असून त्याच्यावर खंडणी, खुनाचा प्रयत्न आणि मारहाण यांसारखे गंभीर गुन्हे दाखल आहेत. प्रकृती खालावल्याने पुण्याच्या रुग्णालयात घटनेची माहिती मिळताच पोलिस निरीक्षक दशरथ चौधरी आपल्या ताफ्यासह घटनास्थळी दाखल झाले. गंभीर जखमी मोहळकरला तातडीने जामखेडमधील खासगी रुग्णालयात व त्यानंतर अहिल्यानगर जिल्हा रुग्णालयात नेण्यात आले. मात्र, प्रकृती अधिकच खालावल्याने गुरुवारी सकाळी त्याला पुढील उपचारासाठी पुण्याला हलवण्यात आले आहे. डॉक्टरांनी दिलेल्या माहितीनुसार, त्याच्या शरीरात चार गोळ्या अडकल्या आहेत. मोहळकर रेकॉर्डवरील गुन्हेगार सागर मोहळकर हा रेकॉर्डवरील गुन्हेगार असून त्याच्यावर खंडणी, खुनाचा प्रयत्न आणि मारहाण यांसारखे अनेक गंभीर गुन्हे दाखल आहेत. तो काही काळ नाशिक कारागृहात होता आणि महिनाभरापूर्वीच जामिनावर सुटून बाहेर आला होता. त्याच्या सुटकेनंतर शहरात पुन्हा टोळीयुद्ध भडकण्याची भीती व्यक्त केली जात होती. या गोळीबारामुळे गुन्हेगारी वर्तुळातील जुना वाद पुन्हा चिघळल्याचे बोलले जात आहे. नुरानी कॉलनी परिसरात कडेकोट बंदोबस्त घटनेनंतर पोलिसांनी नुरानी कॉलनी परिसरात कडेकोट बंदोबस्त तैनात केला असून नाकेबंदी करण्यात आली आहे. पोलीस परिसरातील सीसीटीव्ही फुटेजची तपासणी करत असून आरोपींच्या शोधासाठी विशेष पथके रवाना करण्यात आली आहेत. सध्या शहरातील परिस्थिती तणावपूर्ण शांततेची असून पोलिसांनी नागरिकांना शांततेचे आवाहन केले आहे.