बातमी ऐका (Marathi Voice Reader)
भंडारा जिल्ह्यातील लाखांदूर तालुक्यातील कुडेगाव येथील एका कष्टाळू शेतकऱ्यावर निसर्गाचा कोप नव्हे, तर दुर्दैवाचा डोंगर कोसळला आहे. मोठ्या आशेने खरेदी केलेला ‘जॉन डिअर ५०३९’ हा ट्रॅक्टर अज्ञात कारणाने जळून खाक झाला असून, यात त्यांचे सुमारे ७ लाख रुपयांचे नुकसान झाले आहे. मंगेश मधुकर उरकुडे (४७) असे पिडीत ट्रँक्टर मालकाचे नाव आहे. प्राप्त माहितीनुसार गुरुवारी (१२ मार्च) सायंकाळपर्यंत कुडेगाव-गवराळा मार्गावरील शेतात गव्हाची काढणी जोमाने सुरू होती. हार्वेस्टरने काम आटोपल्यानंतर रात्र झाल्याने मंगेश यांनी आपला MH-33, AC-8635 क्रमांकाचा ट्रॅक्टर सुरक्षित समजून शेतातच उभा केला. मात्र, काळाच्या मनात काही वेगळेच होते. शुक्रवारी सकाळी जेव्हा मंगेश शेताकडे गेले, तेव्हा समोरचे दृश्य पाहून त्यांच्या पायाखालची जमीनच सरकली. रात्रभर धगधगणाऱ्या आगीत त्यांच्या कष्टाचे इंजिन पूर्णपणे कोळसा झाले होते. घातपात की तांत्रिक बिघाड? पोलिस घेणार सीसीटीव्हीची मदत या घटनेची माहिती मिळताच परिसरात एकच खळबळ उडाली. ही आग इंजिनमधील शॉर्ट सर्किटमुळे लागली की कोणी आकसापोटी लावली, याबाबत तर्क-वितर्क लढवले जात आहेत. लाखांदूर पोलिस ठाण्याचे पोलिस निरीक्षक सचिन पवार यांनी तातडीने तपासाची चक्रे फिरवली आहेत.लगावातील आणि परिसरातील सीसीटीव्ही कॅमेऱ्यांचे फुटेज तपासले जात असून, तांत्रिक तज्ज्ञांचीही मदत घेतली जात आहे. मागील वर्षीच साडेसात लाख रुपये खर्चून घेतलेला हा ट्रॅक्टर मंगेश यांच्या उदरनिर्वाहाचे मुख्य साधन होते. आता ऐन रोवणीच्या हंगामात ट्रॅक्टर जळाल्याने शेतीची कामे कशी करायची आणि झालेले मोठे कर्ज कसे फेडायचे, असा यक्ष प्रश्न या तरुण शेतकऱ्यासमोर उभा ठाकला आहे. या दुर्दैवी घटनेमुळे संपूर्ण तालुक्यात हळहळ व्यक्त होत असून, प्रशासनाने तातडीने पंचनामा करून मदत द्यावी, अशी मागणी ग्रामस्थांनी केली आहे.
