बातमी ऐका (Marathi Voice Reader)
नियतीचा खेळ किती क्रूर असतो याचा प्रत्यय लाखांदूर तालुक्यातील इंदोरा येथे आला आहे. ज्या घरात काही दिवसांवर मुलीचे लग्न येऊन ठेपले होते, त्याच घराचा आधारस्तंभ काळाने हिरावून नेला. आपल्या लाडक्या मुलीच्या लग्नाची पत्रिका वाटून मित्रासोबत घरी परतणाऱ्या पित्याचा भीषण रस्ते अपघातात जागीच मृत्यू झाला. अर्जुनी मोरगाव जवळील अरूण नगर परिसरात गिट्टीने भरलेला १२ चक्का ट्रक दुचाकीवर उलटल्याने झालेल्या या भीषण अपघातात दोन जणांना आपले प्राण गमवावे लागले आहेत. मिळालेल्या माहितीनुसार, इंदोरा येथील प्रतिष्ठित नागरिक रमेश सावस्कार (वय ४८) यांच्या मुलीचे लग्न २ एप्रिल रोजी नियोजित आहे. सध्या सर्वत्र लग्नाची लगबग सुरू असून, रमेश सावस्कार हे आपले मित्र अशोक काळबांदे (वय ५२) यांच्यासोबत सासुरवाडी खामखुरा येथे निमंत्रण पत्रिका वाटण्यासाठी गेले होते. १३ मार्च रोजी रात्री ८:३० वाजताच्या सुमारास, पत्रिका वाटप आणि जेवण आटोपून दोघेही दुचाकीने आपल्या गावाकडे परतत होते. दरम्यान अर्जुनी मोरगाव जवळील अरूण नगर परिसरातून जात असताना, समोरून गिट्टीने भरलेला एक १२ चाकी ट्रक भरधाव वेगात येत होता. दरम्यान, चालकाचे वाहनावरील नियंत्रण सुटल्याने हा अवजड ट्रक थेट सावस्कार यांच्या दुचाकीवर पलटी झाला. हा अपघात इतका भीषण होता की, ट्रकखाली दबल्या गेल्यामुळे रमेश सावस्कार आणि अशोक काळबांदे या दोघांचाही जागीच चेंदामेंदा होऊन मृत्यू झाला. अपघाताची तीव्रता एवढी मोठी होती की मृतदेहांची ओळख पटवणेही कठीण झाले होते, मात्र अशोक काळबांदे यांच्या खिशातील पाकीटावरून त्यांची ओळख पटली. गावावर शोककळा, सर्वत्र हळहळ मृतक रमेश सावस्कार हे इंदोरा येथील ‘कमलाबाई कृषी केंद्रा’चे मालक होते, तर अशोक काळबांदे हे ‘अशोक फोटो स्टुडिओ’ चे मालक होते. व्यवसायानिमित्त या दोन्ही व्यक्तींचा परिसरात मोठा जनसंपर्क होता. ज्या घरात सनई-चौघडे वाजणार होते, तिथे आता शोककळा पसरली असून सावस्कार आणि काळबांदे कुटुंबावर दुःखाचा डोंगर कोसळला आहे. या घटनेमुळे संपूर्ण लाखांदूर तालुक्यात हळहळ व्यक्त केली जात आहे.
