बातमी ऐका (Marathi Voice Reader)
नवस फेडण्यासाठी आलेल्या एका कुटुंबावर मधमाश्यांनी हल्ला केल्याची भयंकर घटना चंद्रपूरच्या नागभीड तालुक्यातील प्रसिद्ध सातबहिणींच्या डोंगावर घडली आहे. या घटनेत 4 जण जखमी झाले असून, त्यांच्यावर रुग्णालयात उपचार सुरू आहेत. हे कुटुंब आपल्या मुलीचा नवस फेडण्यासाठी या डोंगरावर आले होते. यासंबंधीच्या माहितीनुसार, चाचरकर कुटुंबातील काही सदस्य सातबहिणींच्या डोंगावर आपल्या मुलीचा नवस फेडण्यासाठी आले होते. त्यांनी पूजा सुरू केली असताना अचानक मधमाश्यांचा थवा त्या ठिकाणी आला. त्यांनी चाचरकर कुटुंबीयांवर हल्ला केला. यामुळे पूजास्थळी एकच धावपळ उडाली. सर्वजण जीवाच्या आकांताने वाट मिळेल तिकडे पळत होते. मधमाश्यांपासून स्वतःला वाचवण्याचा प्रयत्न करत होते. पण त्यानंतरही या घटनेत पुजारी विठ्ठल चाचरकर (55), नत्थू चाचरकर (62), कविता चाचरकर (52) व सायली चाचरकर (3) हे 4 जण जखमी झाले. पोलिस, वनाधिकाऱ्यांनी केली सुटका या घटनेची माहिती मिळताच तळोधी पोलिस ठाण्याचे ठाणेदार व वनपरिक्षेत्राधिकाऱ्यांनी तत्काळ घटनास्थळी धाव घेतली. त्यांनी बचावकार्य राबवून तत्काळ जखमींना सुरक्षितरित्या डोंगरावरून खाली आणले. त्यानंतर त्यांना तातडीने गोविंदपूर व तळोधी येथील रुग्णालयात उपचारासाठी दाखल करण्यात आले. तिथे त्यांची प्रकृती स्थिर असल्याचे समजते. वनविभागाने भाविकांना अशा डोंगराळ भागात पूजा करताना धूर किंवा मोठा आवाज न करण्याचे आवाहन केले आहे. उल्लेखनीय बाब म्हणजे सातबहिणी डोंगरावर मधमाश्यांची अनेक पोळी आहेत. उन्हाळ्याच्या दिवसांत किंवा पूजेसाठी लावण्यात येणाऱ्या उदबत्तींच्या धुरामुळे या माश्या आक्रमक होतात. त्यामुळे भाविकांनी डोंगरावर जाताना विशेष खबरदारी घेण्याची गरज व्यक्त होत आहे. माता न तू वैरिणी दुसरीकडे, एका निर्दयी आईने आपल्या पोटच्या गोळ्याला रस्त्यावर फेकून दिल्याची धक्कादायक घटना ठाणे जिल्ह्यातील पेणकरवाडा येथील वर्तक गल्लीत घडली आहे. पोलिसांच्या माहितीनुसार, मीरा रोड पूर्वीतील वर्तक गल्लीत एक 3-4 महिन्यांचे मृत अर्भक सापडल्याची माहिती समाजसेवक सोमनाथ पवार यांनी काशिमीरा पोलिसांना दिली. घटनेचे गांभीर्य ओळखून पोलिस पथकाने घटनास्थळी धाव घेऊन मृत अर्भक ताब्यात घेतले. कुणीतरी अज्ञात व्यक्तीने आपल्या अपत्याचा जन्म लपवण्याच्या उद्देशाने मृत अर्भक उघड्यावर फेकून त्याची विल्हेवाट लावल्याचा प्राथमिक अंदाज पोलिसांनी व्यक्त केला आहे. या प्रकरणी काशिमीरा पोलिस ठाण्यात अज्ञाताविरोधात गुन्हा दाखल करण्यात आला आहे. याचा अधिक तपास सहाय्यक पोलिस निरीक्षक मंगेश बुहऱ्हाडे करत आहेत.
