बातमी ऐका (Marathi Voice Reader)
छत्रपती संभाजीनगर जिल्ह्यातील कन्नड तालुक्यातील आडगांव भोसले येथील ३० ंवर्षीय तरुण शिव एकनाथ शिंदे हा डोक्यावर छत्रपती शिवाजी महाराजांची पाच कीलो वजनाची मूर्ती घेऊन छत्रपती संभाजीनगर ते किल्ले रायगडपर्यंत ४५० की.मी. पदयात्रा करत आहे. या तरुणाने (२० मे) रोजी छत्रपती संभाजीनगरमधील क्रांती चौक येथील छत्रपती शिवाजी महाराज यांना अभिवादन करून आपल्या पायी पदयात्रेचा शुभारंभ केला. शिव शिंदे या यात्रेत छत्रपती संभाजीनगर ते त्र्यंबकेश्वर नाशिक मार्गे किल्ले रायगडकडे जाणार आहे. २० दिवस छत्रपती शिवाजी महाराजांची मूर्ती डोक्यावर घेऊन पायी चालणार आहे. ६ जून रोजी शिवराज्यभिषेक दिनी किल्ले रायगडावर पोहोचण्याचा त्याचा संकल्प आहे. छत्रपती शिवाजी महाराज यांची शिकवण अंगीकारावी, गोमातेला राष्ट्रमाता म्हणून सन्मान मिळावा, महिला मुलींचे रक्षण तरुणांनी करावे, तरुणांनी साहसी बनावे, सर्वांनी वृक्षारोपण करून वृक्षाचे संवर्धन करावे, असा संदेश शिव शिंदे या पदयात्रेद्वारे तरुणांना देत आहे. त्याच्या या पदयात्रेत तो बोर दहेगाव येथून नागपूर मुंबई राष्ट्रीय महामार्गाने जात असतांना बोर दहेगाव येथील ग्रामस्थांनी त्याचा सत्कार केला व पदयात्रेसाठी शुभेच्छा दिल्या.
