सुरेश पाचभाई मारेगाव
मारेगाव : येथील आर्ट्स, कॉमर्स अँड सायन्स कॉलेजच्या विज्ञान शाखेच्या विद्यार्थ्यांचा गुजरात राज्यातील शैक्षणिक अभ्यास दौरा उत्साहात आणि यशस्वीपणे पार पडला. दिनांक ९ मार्च ते १६ मार्च २०२६ दरम्यान आयोजित या दौर्यात सुमारे ६० विद्यार्थी व प्राध्यापकांनी सहभाग घेतला.
विद्यार्थ्यांच्या सर्वांगीण विकासाला चालना देण्यासाठी महाविद्यालयाचे प्राचार्य डॉ.ए.एन. घरडे यांनी या उपक्रमास प्रोत्साहन दिले. त्यांच्या मार्गदर्शनाखाली दौऱ्याचे नियोजन सुयोग्यरीत्या पार पडले. दौर्याचे समन्वयक म्हणून वनस्पतीशास्त्र विभाग प्रमुख डॉ. विनोद चव्हाण व गणित विभाग प्रमुख प्रा. अक्षय जेनेकर यांनी जबाबदारी प्रभावीपणे सांभाळली.
या अभ्यास दौर्यादरम्यान विद्यार्थ्यांनी द्वारका, सोमनाथ मंदिर, अहमदाबाद, सायन्स सिटी, साबरमती आश्रम, रण ऑफ कच्छ, वे ऑफ हेवन, भुज, वडोदरा तसेच स्टॅच्यू ऑफ युनिटी या ऐतिहासिक, सांस्कृतिक आणि वैज्ञानिक स्थळांना भेट दिली. या भेटींमुळे विद्यार्थ्यांना भारताच्या समृद्ध परंपरेसोबत आधुनिक विज्ञान-तंत्रज्ञानाचीही सखोल ओळख झाली.
अहमदाबाद येथील सायन्स सिटीमध्ये विद्यार्थ्यांनी विविध वैज्ञानिक प्रयोग आणि आधुनिक तंत्रज्ञानाचा प्रत्यक्ष अनुभव घेतला, तर साबरमती आश्रमात महात्मा गांधी यांच्या जीवनकार्याची प्रेरणादायी माहिती मिळाली. स्टॅच्यू ऑफ युनिटी येथे सरदार वल्लभभाई पटेल यांच्या कार्याचा इतिहास विद्यार्थ्यांनी जाणून घेतला.
रण ऑफ कच्छचे निसर्गसौंदर्य, भुज परिसरातील भौगोलिक वैशिष्ट्ये तसेच द्वारका व सोमनाथ येथील धार्मिक वारसा विद्यार्थ्यांसाठी विशेष आकर्षण ठरले. या दौर्यामुळे विद्यार्थ्यांमध्ये वैज्ञानिक दृष्टीकोन, सामाजिक जाणीव आणि राष्ट्रीय एकात्मतेची भावना अधिक दृढ झाली.
दौर्यानंतर विद्यार्थ्यांनी आपले अनुभव शेअर करत महाविद्यालय प्रशासन व प्राध्यापकांचे आभार मानले. लवकरच महाविद्यालयात अनुभव सादरीकरणाचे आयोजनही करण्यात येणार आहे.
एकूणच, हा शैक्षणिक अभ्यास दौरा विद्यार्थ्यांच्या ज्ञानवृद्धीसह व्यक्तिमत्त्व विकासासाठी उपयुक्त ठरला असून महाविद्यालयाच्या उपक्रमांमध्ये एक उल्लेखनीय ठसा उमटवणारा ठरला आहे.
