केवळ चोरीच्या संशयावरून आई-वडिलांनी आपल्या पोटच्या 2 मुलींना रात्रभर उलटे टांगून ठेवल्याची हृदयद्रावक, पण तेवढीच संतापजनक घटना सांगलीच्या आटपाडी तालुक्यात घडली आहे. या घटनेत एका 10 वर्षीय मुलीचा मृत्यू झाला असून, दुसरीची प्रकृती चिंताजनक आहे. या चिमुकल्या रात्रभर पाणी – पाणी म्हणून तडफडत होत्या. पण त्यांच्या आई – वडिलांना त्यांची थोडीही दया आली नाही. यासंबंधीच्या वृत्तानुसार, आटपाडी तालुक्यातील बनपुरी गावात ही घटना घडली आहे. नाना हैबत यमगर असे आरोपी वडिलांचे, तर सानिका असे मृत मुलीचे नाव आहे. शेजाऱ्याच्या घरात चोरी केल्याच्या संशयावरून सानिकाच्या आई-वडिलांनी सानिका व तिची बहीण अनुजा या दोघींना बुधवारी रात्री 8 च्या सुमारास घरात उलटे टांगले होते. या निष्पाप मुली रात्रभर त्याच स्थितीत वेदनेने तडफडत होत्या. त्यांचा घसा कोरडा पडल्यानंतर त्यांनी आई-वडिलांकडे पाण्याची मागणी केली. त्या पाणी-पाणी म्हणून अक्षरशः ओरडत होत्या. पण जन्मदात्या आई-वडिलांच्या हृदयाला थोडाही पाझर फुटला नाही. मुलींच्या आजोबांवरही हल्ल्याचा प्रयत्न आरोपी पालक तसेच रात्रभर झोपी गेले. मुलींचे आजी-आजोबा घराबाहेर झोपले होते. रात्रभर झालेल्या वेदनांमुळे इवलुश्या सानिकाने जीव सोडला. त्यानंतर सकाळी 6 च्या सुमारास तिच्या आजोबांनी या दोघींना खाली उतरवण्याचा प्रयत्न केला. पण त्यांच्या वडिलांनी त्यांच्यावरच कोयत्याने हल्ला करण्याचा प्रयत्न केला. त्यानंतर त्यांनी मुलीजवळ जाऊन पाहिले असता त्यांना सानिका व अनुजा या दोघीही निपचित पडल्याचे जाणवले. त्यानंतर त्यांनी त्यांना खाली उतरवून तातडीने खासगी रुग्णालयात दाखल केले. तिथे सानिकाला मृत घोषित करण्यात आले. असा झाला प्रकरणाचा भांडाफोड सानिकाचा मृत्यू झाल्याचे समजताच आरोपी नाना हैबत यमगर यमगर यांनी तिचा मृतदेह घरी आणला. त्यानंतर आपले भयंकर कृत्य लपवण्यासाठी आई-वडिल व काही नातेवाईकांनी मिळून सानिकाच्या मृतदेहावर गुपचूप अंत्यसंस्कार उरकण्याचा प्रयत्न केला. पण या प्रकरणाचा भांडाफोड गंभीर जखमी झालेल्या अनुजामुळे झाला. खासगी रुग्णालयात उपचार सुरू असताना अनुजा शुद्धीवर आली. तिने डॉक्टरांना आपल्या बापाने दिलेल्या अमानुष वागणुकीचा व सानिकाच्या मृत्यूचा संपूर्ण घटनाक्रम सांगितला. हे ऐकून डॉक्टरही सुन्न झाले. त्यांनी तत्काळ त्याची माहिती पोलिसांना दिली. त्यानंतर या सैतानी कृत्याचा पर्दाफाश झाला. पोलिसांनी आरोपींना ताब्यात घेतले आहे.
