बातमी ऐका (Marathi Voice Reader)
शिवसेनेच्या सत्तासंघर्षाची सुप्रीम कोर्टातील आजची सुनावणी पुन्हा लांबणीवर टाकण्यात आली. ही सुनावणी परवा म्हणजे शुक्रवारी 23 जानेवारी रोजी होणार असल्याची माहिती आहे. पण विधिज्ञ असीम सरोदे यांनी ही सुनावणी शुक्रवारी होण्याची कोणतीही शक्यता नसल्याचा दावा केला आहे. कोर्टाने प्रस्तुत प्रकरणात अद्याप कोणतीही तारीख दिली नाही. या प्रकरणी 4 आठवड्यांनंतर एखाद्या दिवशी सुनावणी होईल, असे ते म्हणालेत. त्यांच्या या विधानामुळे शिवसेना खटल्याची सुनावणी शुक्रवारी होणार किंवा नाही याविषयी साशंकता निर्माण झाली आहे. सरन्यायाधीश सूर्यकांत यांच्या नेतृत्वातील खंडपीठापुढे आज शिवसेना व राष्ट्रवादी काँग्रेसच्या पक्ष व चिन्हाशी संबंधित वादावर सुनावणी होणार होती. हे प्रकरण कोर्टात 37 व्या क्रमांकावर लिस्टेड होते. त्यावर सकाळच्या सत्रात 11.30 वाजता सुनावणी सुरू होऊन ती सलग 2 दिवस चालणे अपेक्षित होते. पण आज अचानक कोर्टापुढे अरावली पर्वतरांगांचे प्रकरण आले. कोर्टाने या प्रकरणावर सुनावणी करण्यासाठी दुपारी 1 ची वेळ निश्चित केली. परिणामी, गत 3 वर्षांपासून कोर्टात खितपत पडलेले सत्तासंघर्षाचे प्रकरण असेच पुढे ढकलण्यात आले. प्रकरणावर 4 आठवड्यांनी होणार सुनावणी -असीम सरोदे यासंबंधीच्या वृत्तानुसार, शिवसेना व राष्ट्रवादीशी संबंधित या प्रकरणावर येत्या शुक्रवारी सुनावणी होण्याची शक्यता आहे. पण असीम सरोदे यांनी हा दावा जोरकसपणे फेटाळले आहे. तसेच हे प्रकरण सतत लांबणीवर टाकले जात असल्यावर नाराजीही व्यक्त केली आहे. ते म्हणाले, आज सर्वोच्च न्यायालयातील सत्ता संघर्ष सुनावणी पुढे ढकलली जाणार हे मला कालच माहिती असल्याने मी आज दिल्लीला गेलो नव्हतो. शिवसेना सत्तासंघर्ष प्रकरणामध्ये कोणतीही नक्की तारीख दिलेली नाही. कुणीतरी पसरविले की 23 जानेवारी या तारखेला सुनावणी आहे. मला सुद्धा एका कार्यक्रमात असताना हीच काही चॅनेल वरील चुकीची माहिती कळली. परंतु याप्रकरणात कोणतीही तारीख अजून दिलेली नाही. चार आठवड्यांनी कोणतीतरी तारीख होईल. कृपया याची नोंद घ्यावी की तारखेबाबत विनंती ऐकून घेण्यास सुद्धा सुप्रीम कोर्टाने नकार दिला आणि फॉर विक्स असे म्हणून कोर्टाचे कामकाज संपले. त्यामुळे नक्की तारीख व्हायची आहे, असे असीम सरोदे यांनी म्हटले आहे. असीम सरोदे यांच्या या विधानामुळे शिवसेनेच्या पुढील सुनावणीविषयी साशंकता व्यक्त केली आहे. हे ही वाचा… शिवसेना-राष्ट्रवादी पक्षचिन्हाची सुनावणी पुन्हा लांबणीवर:सुप्रीम कोर्ट आता शुक्रवारी करणार फैसला!
महाराष्ट्रातील सत्तासंघर्षाशी संबंधित शिवसेना आणि राष्ट्रवादी काँग्रेसच्या पक्ष आणि चिन्हाच्या वादावरील सर्वोच्च न्यायालयातील महत्त्वाची सुनावणी पुन्हा एकदा लांबणीवर पडली आहे. आज, 21 जानेवारी रोजी सरन्यायाधीशांच्या खंडपीठासमोर या प्रकरणावर सुनावणी होणार होती, मात्र आता ही सुनावणी येत्या शुक्रवारी होणार असल्याची माहिती समोर आली आहे. गेल्या तीन वर्षांपासून प्रलंबित असलेल्या या प्रकरणाकडे संपूर्ण महाराष्ट्राचे लक्ष लागले आहे. वाचा सविस्तर
