बातमी ऐका (Marathi Voice Reader)
विधानसभा व विधान परिषद मिळून एकूण ३६६ आमदारांसाठी उभारण्यात येत असलेल्या ‘मनोरा’ आमदार निवासस्थान पुनर्विकास प्रकल्पाला वेग आला आहे. या प्रकल्पाचे सुमारे ४० टक्के काम पूर्ण झाले असून, हरित इमारत तत्त्वावर उभारल्या जाणाऱ्या या इमारतीमध्ये प्रत्येक आमदाराला तब्बल १ हजार चौरस फुटांचे आधुनिक घर मिळणार आहे. विधान परिषदेचे सभापती राम शिंदे यांच्या मार्गदर्शनाखाली आमदार निवासाचे काम सुरू आहे. सार्वजनिक बांधकाम विभागाच्या वरिष्ठ अधिकाऱ्यांनी दिलेल्या माहितीनुसार, “मनोरा’ आमदार निवासाचा प्रकल्प मार्च २०२८ पर्यंत, तर फोर्ट भागातील ऐतिहासिक ‘मॅजेस्टिक’ आमदार निवासाचे काम मार्च २०२७ पर्यंत पूर्ण करण्याचे लक्ष्य आहे. आमदारांना निवासासाठी मुंबईत आकाशवाणी, जुने विधानभवन, मॅजेस्टिक आणि मनोरा अशी ४ ठिकाणे आहेत. मनोरा इमारत पाडून एल अँड टी कंपनीमार्फत ४२ आणि २९ मजल्यांचे २ हायटेक टॉवर्स उभारले जात आहेत. त्यात ३६८ फ्लॅट्स असतील. ‘मॅजेस्टिक’ निवासस्थानी ७२ खोल्या असतील. पंचतारांकित सोयीसुविधा वैयक्तिक सोयी : प्रत्येक फ्लॅटमध्ये आमदारांसाठी स्वतंत्र निवास, कर्मचारी कक्ष आणि मतदार-अभ्यागतांसाठी बैठकीची सुसज्ज खोली असेल. आधुनिक मनोरंजन व आरोग्य : संकुलात मिनी थिएटर, अत्याधुनिक जिम, बहुउद्देशीय सभागृह, प्रेक्षागृह आणि ग्रंथालय असेल. बिझनेस आणि संस्कृती : व्यवसाय केंद्र , अतिथी कक्ष आणि सांस्कृतिक केंद्राची सोय असेल. भव्य पार्किंग: दोन्ही टॉवर्स मिळून सुमारे ७०० वाहनांसाठी अद्ययावत पोडियम पार्किंगची व्यवस्था आहे. आमदारांना एकाच ठिकाणी सोयीनिशी राहता यावे, यासाठी हा प्रकल्प आखला गेला आहे विधानसभेचे २८८ आणि विधान परिषदेचे ७८ मिळून राज्यातील सर्व ३६६ आमदारांना एकाच ठिकाणी सर्व सोयींनिशी राहता यावे, यासाठी हा प्रकल्प आखला गेला आहे. या प्रकल्पासाठी सुरुवातीला १,७६३ कोटी रुपयांची निविदा काढण्यात आली होती. त्यानंतर सरकारने विकास शुल्कासाठी अतिरिक्त ५० कोटी ५५ लाख रुपयांच्या निधीला मंजुरी दिली. मात्र, दरम्यानच्या काळात सर्वोच्च न्यायालयाच्या आदेशानुसार आराखड्यात काही बदल करावे लागल्याने, या प्रकल्पाचा एकूण खर्च आणखी वाढण्याची शक्यता अधिकाऱ्यांनी वर्तवली आहे.
