पिण्याच्या पाण्यासाठी वणवण भटकण्याची वेळ आलेल्या पांढरकवडा ग्रामस्थांच्या हाकेला आमदार संजय देरकर यांनी प्रतिसाद देत अवघ्या दोन दिवसांत दिलेले आश्वासन पूर्ण करून दाखवले आहे. गावात निर्माण झालेल्या तीव्र पाणीटंचाईमुळे नागरिकांचे जनजीवन विस्कळीत झाले होते. महिलांना, ज्येष्ठ नागरिकांना तसेच लहान मुलांच्या कुटुंबांना पाण्यासाठी मोठी कसरत करावी लागत होती. ही गंभीर परिस्थिती लक्षात घेत आमदार देरकर यांनी स्वतः पुढाकार घेत संबंधित यंत्रणेला आवश्यक निर्देश दिले. पर्यायी जलस्रोत उभारण्याचे काम युद्धपातळीवर सुरू केले. पांढरकवडा येथे पाण्याचा स्रोत उपलब्ध न झाल्याने शेजारील पिसगाव येथे बोरवेल खोदण्याचा निर्णय घेण्यात आला. या बोरवेलला मुबलक पाणी लागल्याने ग्रामस्थांची पाणीटंचाईच्या संकटातून सुटका झाली आहे. गेल्या काही दिवसांपासून पांढरकवडा गावात पिण्याच्या पाण्याची तीव्र टंचाई निर्माण झाली होती. गावातील विहिरी आणि उपलब्ध जलस्रोत कोरडे पडल्याने नागरिकांची मोठी गैरसोय होत होती. या समस्येकडे लक्ष वेधण्यासाठी ग्रामस्थांनी आमदार संजय देरकर यांची भेट घेऊन निवेदन सादर केले. निवेदनाची दखल घेत आमदारांनी संबंधित विभागाशी संपर्क साधून आवश्यक उपाययोजना करण्याचे निर्देश दिले. त्यानंतर तांत्रिक पाहणी करण्यात आली. मात्र पांढरकवडा परिसरात अपेक्षित जलस्रोत उपलब्ध न झाल्याने शेजारील पिसगाव येथे पर्यायी बोरवेल घेण्याचा निर्णय घेण्यात आला. विशेष म्हणजे बोरवेल मशीन दाखल झाल्यापासून प्रत्यक्ष खोदकाम सुरू होईपर्यंत आणि काम पूर्ण होईपर्यंत आमदार देरकर स्वतः घटनास्थळी उपस्थित राहून संपूर्ण प्रक्रियेवर लक्ष ठेवत होते. सुमारे १८० फूट खोलीपर्यंत खोदकाम करण्यात आले. दरम्यान अवघ्या ४० फुटांवरच पाण्याचा स्रोत लागल्याने ग्रामस्थांच्या आशा पल्लवित झाल्या आहेत. ग्रामपंचायत सदस्या सीमा येरमे यांनी जनतेच्या समस्यांबाबत आमदारांची संवेदनशीलता आणि तत्परता कौतुकास्पद असल्याचे नमूद केले. यावेळी तालुका अध्यक्ष पुरुषोत्तम बुटे, उपतालुकाप्रमुख देवा बोबडे, युवासेना अध्यक्ष करण किंगरे, बदरुद्दीन काजी, माजी उपसरपंच सुरज बुटे, अशोकराव चापले, मारोती गौरकार, राजू फरताडे, छत्रपती भोयर, जनार्दन उंबरे, दशरथ भोयर, मारुती जरीले, प्रवीण जरीले, शंकर फरताडे, उमेश मिलमिले, धनराज आस्वले, सचिन आस्वले यांच्यासह अनेक ग्रामस्थ उपस्थित होते. पिसगाव येथील बोरवेलला मुबलक पाणी लागल्याने पांढरकवड्याचा पाणीप्रश्न तात्पुरता मार्गी लागला आहे. आश्वासन अल्पावधीत पूर्ण केल्याबद्दल ग्रामस्थांनी आमदार संजय देरकर यांचे आभार मानले. पाणी हा प्रत्येक नागरिकाचा हक्क पाणी हा प्रत्येक नागरिकाचा मूलभूत हक्क आहे. जनतेच्या अडचणी सोडवणे हे लोकप्रतिनिधी म्हणून माझे कर्तव्य असून, नागरिकांनी दाखवलेल्या विश्वासाला तडा जाऊ देणार नाही. – आमदार संजय देरकर , वणी विधानसभा क्षेत्र.
