भंडारा-गोंदिया स्थानिक स्वराज्य संस्था मतदारसंघात भाजपचे अविनाश ब्राह्मणकर यांनी काँग्रेस समर्थित अपक्ष उमेदवार नरेश ईश्वरकर यांचा १४८ मतांनी पराभव करत दणदणीत विजय मिळवला आहे. ब्राह्मणकर यांना ३०२ तर ईश्वरकर यांना १५२ मते मिळाली. या विजयामुळे भंडारा-गोंदियात भाजपचे नेते आमदार डॉ. परिणय फुके हेच ‘किंगमेकर’ असल्याचे पुन्हा एकदा सिद्ध झाले आहे. तर दुसरीकडे काँग्रेसचे प्रदेशाध्यक्ष नाना पटोले आणि खासदार डॉ. प्रशांत पडोळे यांच्या रणनीतीला मतदारांनी सपशेल नाकारल्याचे स्पष्ट झाले आहे. फुके यांच्या ‘दादा’गिरीवर पुन्हा शिक्कामोर्तब या निवडणुकीची संपूर्ण धुरा भाजपचे नेते आणि आमदार डॉ. परिणय फुके यांच्या खांद्यावर होती. महायुतीमधील शिवसेना आणि राष्ट्रवादी काँग्रेस अजित पवार गट या घटकांना सोबत घेऊन त्यांनी सूक्ष्म नियोजन केले होते. मतदान फुटू नये यासाठी त्यांनी आखलेली रणनीती यशस्वी ठरली. या निकालानंतर भंडारा आणि गोंदिया जिल्ह्यात परिणय फुके यांचेच राजकीय वर्चस्व चालते, हे पुन्हा एकदा अधोरेखित झाले आहे. पटोले आणि पडोळे यांच्या रणनीतीचा पुरता फज्जा काँग्रेसचे ज्येष्ठ नेते नाना पटोले यांचा हा गड मानला जातो. लोकसभा निवडणुकीत काँग्रेसचे डॉ. प्रशांत पडोळे यांनी या मतदारसंघात विजय मिळवला होता. त्यामुळे काँग्रेसचा आत्मविश्वास वाढला होता. मात्र, स्थानिक स्वराज्य संस्थेच्या निवडणुकीत थेट काँग्रेस पक्षाचा उमेदवार न देता अपक्षाला पाठिंबा देण्याची पटोले यांची खेळी उलटली. मतदानपूर्व काळातील बैठका आणि मतदानानंतरचे त्यांचे आकडेवारीचे दावे फोल ठरले असून, या पराभवामुळे काँग्रेस बॅकफूटवर आली आहे. भविष्यातील राजकीय परिणाम या निकालामुळे आगामी स्थानिक स्वराज्य संस्था जिल्हा परिषद, ग्रामपंचायत निवडणुकीपूर्वी महायुतीला मोठा बूस्टर डोस मिळाला आहे. तर महाविकास आघाडीला, विशेषतः काँग्रेसला या पराभवातून धडा घेऊन भंडारा-गोंदियातील आपली विखुरलेली शक्ती पुन्हा एकत्रित करण्यासाठी मोठी कसरत करावी लागणार आहे. निवडणुकीचे सांख्यिकी विश्लेषण
