बातमी ऐका (Marathi Voice Reader)
अकोला स्थानिक गुन्हे शाखेने (एलसीबी) ऑपरेशन प्रहार अंतर्गत डबकी रोड पोलीस ठाण्याच्या हद्दीतील खैर मोहम्मद प्लॉट परिसरात एक मोठी कारवाई केली. या कारवाईत अवैध कत्तलीसाठी निर्दयीपणे डांबून ठेवलेल्या १५ गोवंशांची सुटका करण्यात आली असून, चार लाख २० हजार रुपयांचा मुद्देमाल जप्त करण्यात आला आहे. स्थानिक गुन्हे शाखेचे पोलिस निरीक्षक नितीन लेकूरकर यांना गोपनीय बातमीदाराद्वारे माहिती मिळाली, खैर मोहम्मद प्लॉट परिसरात एका इसमाने गोवंश जातीची जनावरे कत्तलीसाठी बांधून ठेवली आहेत. त्यानुसार त्यांच्या पथकाने खैर मोहम्मद प्लॉट येथील एका गोठ्यावर छापा टाकला. या छाप्यात गोठ्याचा मालक मोहम्मद अदनान शेख इरफान (२०),रा. खैर मोहम्मद प्लॉट, अकोला याला ताब्यात घेतले. त्याच्या ताब्यातून १५ गोवंश जातीची जनावरे जप्त करण्यात आली. सर्व जनावरे जखमी असल्याने उपचार व सुरक्षित संगोपनासाठी त्यांना आदर्श गोसेवा संस्थान, म्हैसपूर येथे पाठवले आहे. ही कारवाई पो. नि. नितीन लेव्हरकर, सपोनि गोपाल जाधव, उप निरीक्षक माजिद पठाण, अंमलदार शेख हसन, अब्दुल माजीद, भास्कर धोत्रे, रवी खंडारे, महेंद्र मलिये, वसीमोद्दीन, श्रीकांत पातोंड आणि दिपके यांनी केले. कारवाई करुन गोवंश मुक्त करण्यात आले.
