बातमी ऐका (Marathi Voice Reader)
मनसेकडून मानधनावर तात्पुरत्या शिक्षकाची तयारी
सुरेश पाचभाई मारेगाव
मारेगाव पंचायत समिती अंतर्गत येणाऱ्या जळका येथील जिल्हा परिषद शाळेत शिक्षकांची तीव्र कमतरता असल्याने संतप्त पालक व शाळा व्यवस्थापन समितीच्या सदस्यांनी सोमवारी पंचायत समिती कार्यालयातच शाळा भरवून शासनाच्या शैक्षणिक धोरणाकडे लक्ष वेधले.
या अनोख्या आंदोलनामुळे परिसरात खळबळ उडाली.
घटनेची माहिती मिळताच महाराष्ट्र नवनिर्माण सेनेचे नेते राजू उंबरकर यांनी पंचायत समिती गाठून गटविकास अधिकारी भीमराव व्हनखंडे तसेच प्रभारी शिक्षणाधिकाऱ्यांशी चर्चा केली.
जळका शाळेत तातडीने शिक्षकाची नियुक्ती करण्यात यावी, तसेच त्या शिक्षकाचे मानधन मनसेच्या वतीने देण्यात येईल, अशी ग्वाही त्यांनी दिली. त्यामुळे तात्पुरत्या स्वरूपात प्रश्न मार्गी लागल्याने पालक आणि विद्यार्थ्यांनी समाधान व्यक्त केले.
मारेगाव तालुक्यातील जिल्हा परिषद शाळांमध्ये तब्बल ८३ शिक्षकांची पदे रिक्त असल्याने ग्रामीण भागातील शिक्षण व्यवस्थेवर त्याचा गंभीर परिणाम होत आहे. जळका शाळेतील विद्यार्थ्यांना प्राथमिक अक्षरओळखही व्यवस्थित नसल्याचे या वेळी निदर्शनास आले.
शिक्षकांच्या कमतरतेबरोबरच शाळेची इमारतही जीर्ण अवस्थेत असून तिची तातडीने दुरुस्ती करण्यात यावी, अशी मागणी पालकांनी केली.यावेळी मनसेचे जिल्हा उपाध्यक्ष संतोष रोगे, शहराध्यक्ष चांद बहादे, आकाश खामणकर यांच्यासह जळका गावातील पालक,शाळा व्यवस्थापन समितीचे सदस्य व विद्यार्थी उपस्थित होते.
