बातमी ऐका (Marathi Voice Reader)
आत्महत्येचा प्राथमिक अंदाज; कारण अद्याप अस्पष्ट
सुरेश पाचभाई | मारेगाव
मारेगाव तालुक्यातील बुरांडा येथील मारोती देवराव कामटकर (वय अंदाजे ४५) यांचा राज्य महामार्गावरील बुरांडा पुलावर गळफास घेतलेल्या अवस्थेत मृतदेह आढळून आल्याने परिसरात हळहळ व्यक्त होत आहे. ही घटना शुक्रवार, दि. २४ जुलै २०२६ रोजी सकाळी सुमारे ८ वाजण्याच्या सुमारास उघडकीस आली.
घटनेची माहिती मिळताच मारेगाव पोलीस ठाण्याचे अधिकारी व कर्मचारी घटनास्थळी दाखल झाले. पोलिसांनी पंचनामा करून मृतदेह शवविच्छेदनासाठी मारेगाव येथील ग्रामीण रुग्णालयात पाठविण्यात आला. या प्रकरणी आकस्मिक मृत्यूची नोंद करण्यात आली असून पुढील तपास सुरू आहे.
पोलिसांच्या प्राथमिक माहितीनुसार, ही आत्महत्येची घटना असावी असा अंदाज व्यक्त करण्यात येत आहे. मात्र, आत्महत्येमागील नेमके कारण अद्याप स्पष्ट झालेले नसून, सर्व बाबींचा तपास सुरू असल्याची माहिती पोलिसांनी दिली.
मारोती कामटकर यांच्या पश्चात एक मुलगी व एक विवाहित बहीण असा आप्तपरिवार आहे. त्यांच्या आकस्मिक निधनाने बुरांडा गावासह परिसरात शोककळा पसरली असून, नागरिकांकडून हळहळ व्यक्त केली जात आहे.
