सुरेश पाचभाई मारेगाव
मारेगाव आषाढी वारीनंतर लाखो वारकऱ्यांच्या उपस्थितीमुळे चंद्रभागा नदी परिसरात निर्माण झालेली अस्वच्छता दूर करण्यासाठी वंदनीय राष्ट्रसंत तुकडोजी महाराज, गीताचार्य तुकाराम दादा आणि संत गाडगेबाबा यांच्या अनुयायांनी पुन्हा एकदा श्रमदानाचा आदर्श घालून दिला आहे.
पंढरपूर येथील सांगोला मार्गावरील ग्रामगीता तत्त्वज्ञान सक्रिय दर्शन मंदिर संस्था (गा.स.द.मं.) यांच्या वतीने सलग अकराव्या वर्षी चंद्रभागा स्वच्छता अभियान राबविण्यात येत असून, यंदाचे अभियान २७ ते २९ जुलै २०२६ या कालावधीत सुरू आहे.
महाराष्ट्राच्या कानाकोपऱ्यातून आलेले शेकडो गुरुदेव भक्त स्वखर्चाने या अभियानात सहभागी होत आहेत.
हातात खराटे घेऊन चंद्रभागेच्या पात्रातील व परिसरातील कचरा साफ करत स्वच्छतेचा संदेश देत आहेत. विशेष म्हणजे या अभियानात महिलांचा उत्स्फूर्त सहभाग लक्षवेधी ठरत आहे.
भू-वैकुंठ पंढरीत आषाढी व कार्तिकी वारीदरम्यान लाखो भाविक दाखल होत असल्याने मोठ्या प्रमाणावर अस्वच्छता निर्माण होते.
मात्र, “प्रत्येक वारकऱ्याने स्वतःकडून कोणत्याही प्रकारची घाण होणार नाही, असा संकल्प केला तर अस्वच्छतेच्या राक्षसाचा कायमचा नायनाट होऊ शकतो,” हा संदेश समाजापर्यंत पोहोचविणे हा या अभियानाचा प्रमुख उद्देश असल्याचे आयोजकांनी सांगितले.
हा उपक्रम संस्थेचे संचालक श्री सेवकराम मिलमिले यांच्या मार्गदर्शनाखाली पार पडत असून, सरपंच सौ. सुषमा ढोके, सुरज येवले, दिवाकर गाडगे, नामदेव येडे, कवडू वडस्कर, भूषण ढोबळे, गजानन घुमणर, स्वच्छता दूत कमलाजी कावळे, सुरेश चौधरी, सौ. अनिता ढेंगळे, सौ. सुमन आवारी, हरिभाऊ शिंदे, रुपेश ढोके, प्रा. सुरेंद्र नावडे यांच्यासह शेकडो गुरुदेव भक्तांनी श्रमदान केले.
या अभियानासाठी संस्थेचे अध्यक्ष श्री जनार्दन देठे व सचिव श्री दिलीप भोयर यांचे मोलाचे सहकार्य लाभले.
छायाचित्र ओळ : चंद्रभागा स्वच्छता अभियानांतर्गत हातात खराटे घेऊन चंद्रभागा नदी परिसरात श्रमदान करताना राष्ट्रसंत तुकडोजी महाराज, गीताचार्य तुकाराम दादा व संत गाडगेबाबा यांचे अनुयायी.
छायाचित्र : प्रा. सुरेंद्र गोविंद नावडे
