बातमी ऐका (Marathi Voice Reader)
सोलापूर : पारंपरिक शेतीला फाटा देत योग्य नियोजन आणि अभ्यासपूर्ण पीक पद्धतीचा अवलंब केल्यास शेतीतून घवघवीत यश मिळवता येतं. हे सोलापूरच्या एका प्रयोगशील शेतकऱ्याने सिद्ध करून दाखवलं आहे. मोहोळ तालुक्यातील शेतकरी बाळासाहेब भोसले यांनी केवळ एका एकरात गुलछडीच्या फुलांची लागवड करून गेल्या तीन वर्षांत तब्बल 8 लाख रुपयांचे उत्पन्न मिळवले आहे.
तीन वर्षांचे नियोजन अन् हमखास उत्पन्न
मोहोळ तालुक्यातील बाळासाहेब भोसले हे गेल्या 4 ते 5 वर्षांपासून गुलछडीची शेती करत आहेत. गुलछडी पिकाचे वैशिष्ट्य म्हणजे एकदा लागवड केल्यानंतर पुढील तीन वर्षांपर्यंत यातून सतत उत्पन्न मिळत राहते. लागवडीनंतर साधारण पाच महिन्यांनी झाडांना फुले येण्यास सुरुवात होते. भोसले रोज सकाळी फुलांची तोडणी करून ती मुंबईतील दादर मार्केटमध्ये विक्रीसाठी पाठवतात.
दादर मार्केटमध्ये फुलांना मोठी मागणी
मुंबईच्या बाजारपेठेत या फुलांना चांगला उठाव मिळत असून त्यांना 50 रुपयांपासून ते 300 रुपये प्रति किलोपर्यंतचा दर मिळतो. बाजारातील या चांगल्या भावामुळे बाळासाहेब यांना एकट्या या वर्षात सुमारे 2 लाख रुपयांचे उत्पन्न मिळाले आहे. तर तीन वर्षांच्या संपूर्ण कालावधीत त्यांनी गुलछडीच्या माध्यमातून 8 लाखांची कमाई केली आहे.
योग्य बाजारपेठेचा अभ्यास आणि वेळेवर केलेले नियोजन यामुळेच शेतीतून असा मोठा नफा मिळवणे शक्य झाल्याचे भोसले सांगतात. त्यांच्या या यशामुळे परिसरातील इतर शेतकऱ्यांनाही फूलशेती सारख्या नगदी पिकांकडे वळण्याची प्रेरणा मिळत आहे.
