बातमी ऐका (Marathi Voice Reader)
सोलापूर: प्रेम प्रकरणातून एका 21 वर्षीय तरुणाने स्टेटस ठेवून आत्महत्या केल्याची धक्कादायक घटना सोलापुरातील सात रस्ता परिसरात घडली. चंद्रकुमार शिवा गुडशेललू असे मृत तरुणाचे नाव असून तो म्युनिसिपल कॉलनीत राहत होता. बुधवारी दुपारी त्याने राहत्या घरी गळफास घेऊन आपली जीवनयात्रा संपवली. या दुर्दैवी घटनेने संपूर्ण परिसर सुन्न झाला असून गुडशेललू कुटुंबावर दुःखाचा डोंगर कोसळला आहे.
मिळालेल्या माहितीनुसार, चंद्रकुमारचे शहरातील एका तरुणीवर मनापासून प्रेम होते. काही दिवसांपूर्वीच मोठ्या उत्साहात आणि दोन्ही कुटुंबांच्या संमतीने त्यांचा साखरपुडा पार पडला होता. चंद्रकुमारच्या डोळ्यात भविष्यातील सुंदर संसाराची स्वप्ने तरळत होती. मात्र, साखरपुडा झाल्यानंतर काही दिवसांतच मुलीच्या आईकडून लग्नासाठी टाळाटाळ केली जाऊ लागली. ज्या प्रेमावर त्याने जीवापाड विश्वास ठेवला, त्याच नात्यात आलेल्या या अनपेक्षित नकाराने आणि दुराव्याने तो पुरता खचून गेला.
देवा काय हे? आधी वडील गेले, मग गाई मेल्या; कर्जाचा डोंगर अन् विहिरीचं पाणी आटलं, 18 वर्षाच्या तरुणांनं…, सगळं गाव रडलं!
मागील काही दिवसांपासून तो प्रचंड मानसिक तणावात होता. मनातील ही वेदना आणि नैराश्य सहन न झाल्याने 30 सप्टेंबर रोजी दुपारी 1:30 वाजेच्या सुमारास त्याने राहत्या घरातील पत्र्याच्या खोलीत साडीच्या साहाय्याने गळफास घेतला. आत्महत्येपूर्वी त्याने सोशल मीडियावर ठेवलेले स्टेटस त्याच्या मनातील असहाय्यता सांगून जात होते.
नातेवाईकांनी त्याला तातडीने सोलापूर शहरातील शासकीय रुग्णालयात दाखल केले, परंतु नियतीला काही वेगळेच मान्य होते. डॉक्टरांनी उपचारापूर्वीच त्याला मृत घोषित केले. अवघ्या 21 व्या वर्षी एका उमद्या तरुणाने प्रेमातील नैराश्यातून असे टोकाचे पाऊल उचलल्याने रुग्णालयात जमलेल्या नातेवाईकांचा आक्रोश काळजाचा ठोका चुकवणारा होता. या घटनेची नोंद सिव्हिल पोलिस चौकीत झाली असून एका फुलण्याआधीच कोमेजलेल्या आयुष्यामुळे सोलापूर शहरात सर्वत्र हळहळ व्यक्त होत आहे.
