जळका शेतशिवारातील घटना
सततच्या आत्महत्येने तालुका हादरला
सुरेश पाचभाई मारेगाव
मारेगाव तालुक्यात होत असलेल्या सततच्या आत्महतेमुळे संपुर्ण तालुका हादरला आहे. प्रशासनाकडून आत्महत्या रोखण्यासाठी कुठलीच ठोस उपाययोजना केली जात नाही.
जळका येथील स्वतःच्या शेतात असलेल्या रोहिणीच्या झाडाला गळफास घेऊन आत्महत्या केल्याची घटना घडली. प्रितम हुसेन आत्राम वय अंदाजे 23 वर्ष असे गळफास घेऊन आत्महत्या केलेल्या युवकाचे नाव आहे.
प्रितम हा वडिलांना शेती कामात मदत करायचा तसेच स्पर्धा परीक्षेची तयारी करीत होता.अशातच काल दिनांक 17 मे 2025 रोज शनिवारला दुपारी 12: 30 वाजता बाहेर जाऊन येतो असे सांगुन तो घरून निघून गेला.
बराच वेळ झाला तरी तो घरी परत न आल्याने घरच्या मंडळींनी त्याची सगळीकडे शोधाशोध केली. पण तो कुठेही दिसून न आल्याने शेवटी सायंकाळी 5 वाजता कुटुंबातील काही सदस्यांनी शेतात जाऊन बघितले असता शेतात असलेल्या रोहिणीच्या झाडाला प्रीतम गळफास घेऊन लटकलेला अवस्थेत दिसला.
प्रितमने गळफास घेतल्याची माहिती कुटुंबियांनी जळका येथील पोलीस पाटलांना दिली.त्यांनी लगेच मारेगाव पोलीस स्टेशनला फोन करून सदर घटनेची माहिती दिली. माहिती मिळताच पोलीस घटनास्थळी दाखल झाले.व मृतदेहाचा घटनास्थळ पंचनामा करून मृतदेह उत्तरीय तपासणी करीता मारेगाव येथील ग्रामीण रुग्णालयात पाठविण्यात आला.
प्रितमच्या पश्चात आई,वडील,एक भाऊ असा आप्त परिवार आहे. सदर घटनेचा पुढील तपास ठाणेदार संजय सोळंके यांचे मार्गदर्शनाखाली जमादार दिगंबर किनाके करीत आहे.
