मारेगाव शहरात घडली भर दुपारी घटना.
मारेगांव तालुका प्रतिनिधी:- सुरेश पाचभाई
[9922862184]
मारेगाव :- आज दिनांक 3 ऑक्टोंबर 2022 रोज सोमवारला दुपारच्या सुमारास मारेगाव शहरात सगळीकडे लोकांची वर्दळ सुरु असते अनेकजण आपल्या कामात गर्क होते.अशातच एक व्यक्ती दुपारी मारेगावच्या मेन चौकामध्ये असलेल्या एका खाणावळीमध्ये जेवण करायला येतो. जेवण करायला लागतो आणि दोन तीन घास होताच लगेच त्या व्यक्तीला हृदयविकाराचा झटका येतो. तो खाली कोसळतो. त्यांना लगेच ग्रामीण रुग्णालयात दाखल केले जाते. परंतु उपचारापूर्वीच त्यांची प्राणज्योत मालवली. ही घटना मनाला धक्का देणारी आहे.
मारेगाव तालुक्यातील वेगाव येथील 58 वर्षीय भास्कर दौलत वेले हे मारेगाव येथे काही कामानिमित्त आले होते. दुपारी आपले काम आटोपून ते मारेगाव शहरातील मुख्य चौकामध्ये असलेल्या एका खाणावळीमध्ये झुणका भाकर खात होते. दोन चार घास खात नाही तोच त्यांना हृदयविकाराचा झटका आला. त्यांना मारेगांव येथील ग्रामीण रुग्णालयत दाखल केले असता त्यांचा मृत्यू झाला असे डॉक्टरांनी घोषित केले.
अविवाहित असलेले भास्कर वेले हे वेगाव येथील माजी उपसरपंच होते.मोजके बोलणारे आणि सर्वांशी मिळून मिसळून वागणारे व्यक्तिमत्व अचानक अशा पद्धतीने जीवनातून एक्झिट झाल्याने सर्वत्र हळहळ व्यक्त केल्या जात आहे. या प्रकरणाचा पुढील तपास मारेगाव पोलीस करत आहे.