महसूल विभागाची धडाकेबाज कारवाई
सुरेश पाचभाई मारेगांव,
मारेगाव: तालुक्यातील रेती घाटातुन अवैधपणे रेतीची मोठया प्रमाणावर तस्करी राजरोसपणे सुरु आहे. यावर वारंवार आळा घालण्याचे प्रयत्न सुरु आहे.परंतु मुजोर रेतीचोर मात्र प्रशासनाला न जुमानता रेती तस्करी करीत आहे.
अशातच आज दिनांक २७ फेब्रुवारी २०२४ च्या मध्यरात्री २: ३० वाजताच्या दरम्यान महसूल प्रशासनाने अवैध रेतीची वाहतूक करणारा एक ट्रॅक्टर व जेसीबी जप्त केली आहे.या धडाकेबाज कारवाईने अवैध रेती तस्करांचे धाबे दणाणले आहे.
तालुक्यात होत असलेली रेतीची अवैध वाहतूक ही प्रशासनाला आव्हान ठरलेली आहे.अवैध रेतीची रात्रदिवस वाहतूक सुरु असल्याच्या माहितीवरून मारेगाव तहसीलदार यांनी दिनांक २७ फेब्रुवारी २०२४ रोज मंगळवारच्या मध्यरात्री २: ३० वाजताच्या सुमारास दापोरा येथील पुलाजवळ अवैधरित्या जेसीबी मशीनद्वारे ट्रॅक्टर मध्ये अवैध रेती उत्खनन करून ती ट्रॅक्टरमध्ये भरीत असताना ट्रॅक्टर व जेसीबी मशीन पकडण्यात आली.
जेसीबी मालक महादापेठ येथील असून टॅक्टर मालक हा चिचमंडळ येथील रहिवासी असल्याची माहिती आहे.सदर दोन्ही वाहन महसूल प्रशासनाने पकडले असून सदर ट्रॅक्टर व जेसिबी मारेगाव येथील तहसील कार्यालयात जमा करण्यात आली आहे.सदरची कारवाई मारेगाव येथील तहसीलदार उत्तम निलावाड,सहाय्यक तलाठी कुडमेथे,सोयाम, मडावी यांनी केली आहे.
