सुरेश पाचभाई मारेगाव,
मारेगाव तालुक्यातील पहापळ येथील शेतकऱ्याने विषारी कीटकनाशक प्राशन करून आत्महत्या केल्याची घटना आज दि.4 जुलै 2024 रोज गुरुवारला सकाळी उघडकीस आली.त्यामुळे तालुक्यामध्ये काही दिवस थांबलेले आत्महत्यांचे सत्र पुन्हा सुरु झाल्याचे दिसत आहे.
तालुक्यातील पहापळ येथील माधवराव केशव खोके अंदाजे वय 55 वर्षे हे आपल्या कुटुंबासह पहापळ येथे राहत होते.आणि शेती करून आपल्या कुटुंबाचा उदरनिर्वाह करायचे.त्यांचेकडे 11 एकर शेती आहे. मागील काही वर्षांपासून त्यांच्या शेतीमध्ये पाहिजे तसे उत्पन्न होत नसल्याने ते कर्जामध्ये डुबलेले होते अशी माहिती आहे.
अशातच काल दि.3 जुलै 2024 रोज बुधवारला रात्री 8:30 वाजता ते घरून शेतातील गोठ्यात बैल व कोबड्या असल्याने जागली साठी जातो असे सांगून शेतात गेले होते.त्यांनी शेतात विषारी कीटकनाशक प्राशन केले. सकाळी कुटुंबातील काही सदस्य शेतात गेले असता सदर घटना उघडकीस आली.
त्यांनी घटनेची माहिती लगेच मारेगाव पोलीस स्टेशनला दिली.माहिती मिळतात मारेगाव पोलीस घटनास्थळी दाखल झाले.घटनास्थळ पंचनामा करून त्यांचा मृतदेह मारेगाव येथील ग्रामीण रुग्णालयात पाठवण्यात आला.त्याचे पश्चात आई,पत्नी, एक मुलगा, दोन मुली असा आप्तपरिवार आहे. या घटनेचा पुढील तपास ठाणेदार शंकर पांचाळ यांचे मार्गदर्शनात जामदार आनंद अलचेवार करीत आहे