सुरेश पाचभाई मारेगाव
मारेगाव: तालुक्यात राष्ट्रीय नैसर्गिक शेती अभियान अंतर्गत एकूण सहा क्लस्टर निवडण्यात आलेले असून एकूण अठरा गावांमध्ये नैसर्गिक शेतीचा कार्यक्रम राबविण्यात येत आहे.
यातील हिवरा मजरा या गावामध्ये राष्ट्रीय नैसर्गिक शेती अभियान अंतर्गत सरपंच आरती विशाल गाडगे व पोलीस पाटील राजेंद्र गाडगे तसेच प्रगतिशील शेतकरी राकेश गाडगे यांच्या प्रमुख उपस्थितीत खरीप पूर्व नियोजन सभा व शेतकरी प्रशिक्षण संपन्न झाले.
प्रसंगी तालुका कृषि अधिकारी मारेगाव कु. दिपाली खवले यांनी नैसर्गिक शेती संकल्पना, नैसर्गिक शेतीचे आरोग्य व पर्यावरणाच्या दृष्टीने महत्व व विविध नैसर्गिक संसाधनांचा शेतीत वापर याविषयी शेतकऱ्यांना संबोधित केले.
तसेच मंडळ कृषि अधिकारी किशोर डोंगरकार यांनी खरीप पिक नियोजन, बिजप्रक्रिया, एकात्मिक अन्नद्रव्य व्यवस्थापन इ. विषयांवर शेतकऱ्यांशी संवाद साधला. सोबतच कृषि सहायक नकुल थोरात यांनी सोयाबीन उगवणक्षमता तपासणी चे महत्व प्रात्यक्षिकासह शेतकऱ्यांना पटवून दिले.
तालुका तंत्रज्ञान व्यवस्थापक प्रसन्न पारस्कर यांनी राष्ट्रीय सेंद्रिय शेती अभियान अंमलबजावणी व सेंद्रिय निविष्ठा तयार करावयाचे तंत्रज्ञान याविषयी शेतकऱ्यांशी चर्चा केली. कार्यक्रमाकरिता परिसरातील भरपूर शेतकरी उपस्थित होते. कार्यक्रमाचे सूत्रसंचालन कृषि सहायक सनथ घोसळकर व आभार प्रदर्शन कृषी सेवक विकास झिने यांनी केले.
