सुरेश पाचभाई | मारेगाव
मारेगाव : धार्मिक श्रद्धा, पर्यटन आणि सामाजिक एकोप्याचा सुंदर संगम ठरलेली “मां वैष्णोदेवी देवदर्शन यात्रा” यंदा मोठ्या उत्साहात संपन्न झाली. या यात्रेला भाविकांकडून उत्स्फूर्त प्रतिसाद मिळाल्याने संपूर्ण परिसर भक्तीमय वातावरणाने भारावून गेला होता.
उत्तर भारतातील विविध धार्मिक व पर्यटन स्थळांचा समावेश असलेल्या या यात्रेमुळे भाविकांना अध्यात्मिक समाधानासह निसर्गरम्य स्थळांचा अविस्मरणीय अनुभव घेता आला.या यात्रेदरम्यान अमृतसर, अटारी बॉर्डर, कटरा येथील मां वैष्णोदेवी मंदिर, भैरवगड, अर्धकुंवारी दर्शन, शिवखोडी, श्रीनगर, सोनमर्ग, पहलगाम, पटणी टॉप, मथुरा तसेच प्रेम मंदिर आदी प्रसिद्ध धार्मिक व पर्यटन स्थळांना भेट देण्यात आली.
भाविकांनी मां वैष्णोदेवीचे पवित्र दर्शन घेत भक्तिभावाने प्रार्थना केली. यात्रेदरम्यान विविध ठिकाणच्या धार्मिक परंपरा, संस्कृती आणि निसर्गसौंदर्याचा अनुभव घेत भाविकांनी यात्रेचा मनमुराद आनंद लुटला.
सदर यात्रेचे आयोजन शिवसेनेचे तालुका प्रमुख विशाल किन्हेकर यांच्या प्रेरणेतून करण्यात आले होते. तसेच महिला सेना सिटी प्रमुख सौ. चेतना विशाल किन्हेकर यांच्या पुढाकारातून यात्रेचे सुयोग्य नियोजन करण्यात आले.
यात्रेदरम्यान भाविकांच्या सुरक्षितता, निवास, भोजन व प्रवासासाठी विशेष सुविधा उपलब्ध करून देण्यात आल्या होत्या.
त्यामुळे संपूर्ण यात्रा शिस्तबद्ध व आनंददायी वातावरणात पार पडली.धार्मिक श्रद्धेबरोबरच सामाजिक सलोखा आणि एकात्मतेचा संदेश देणारी ही यात्रा भाविकांसाठी संस्मरणीय ठरली असून यात्रेनंतर भाविकांमध्ये आनंद, समाधान आणि उत्साहाचे वातावरण पाहायला मिळत आहे.