बातमी ऐका (Marathi Voice Reader)
जिल्हा क्रीडा अधिकारी कार्यालयातर्फे १७ व १९ वर्ष मुले व मुलींच्या राज्यस्तरीय शालेय धनुर्विद्या क्रीडा स्पर्धा २०२५-२६ चे आयोजन १८ ते २० डिसेंबर या कालावधीत करण्यात आले आहे. गुरूवार १८ डिसेंबर २०२५ रोजी सकाळी १० वाजता स्पर्धेचे उद्घाटन होणार आहे. जिल्हा क्रीडा संकुलाच्या खेलो इंडिया आर्चरी आंतरराष्ट्रीय रेंजवर स्पर्धा होणार आहे. ही स्पर्धा देशातील दुसऱ्या क्रमांकाच्या अर्चरी रेंजवर होणार असून येथे एकाचवेळी ३६ धनुर्धर लक्ष्याच्या दिशेने तीर सोडू शकतात, अशी सोय आहे. त्याचप्रमाणे या ठिकाणी धनुर्धरांसाठी सर्वच सुविधाही उपलब्ध आहेत. त्यामुळे येथे सातत्याने राज्यस्तरीय स्पर्धेचे आयोजन होत असते. त्याचप्रमाणे राज्यातील ८ महसूल विभाग आणि १ क्रीडा प्रबोधिनी, पुणे अशा एकूण ९ विभागांतील १७ व १९ वर्षांखालील मुले व मुली यात सहभागी होणार आहेत. स्पर्धेसाठी सुमारे ४८५ खेळाडू, संघव्यवस्थापक, प्रशिक्षक आणि निवड समिती सदस्य उपस्थित राहणार आहेत. उद््घाटन कार्यक्रमाला जिल्हाधिकारी आशिष येरेकर, जिल्हा क्रीडा अधिकारी गणेश जाधव, राज्य ऑलिम्पिक संघटनेचे उपाध्यक्ष अॅड. प्रशांत देशपांडे, राज्य धनुर्विद्या संघटनेचे सचिव प्रमोद चांदूरकर उपस्थित राहतील. जिल्ह्यातील आंतरराष्ट्रीय खेळाडूंचा होणार सत्कार उद्घाटन समारंभात आर्चरी खेळातील आंतरराष्ट्रीय खेळाडू तुषार शेळके, मानव जाधव, कुमकुम मोहोड, यशदिप भोगे, मधुरा धामणगांवकर, पुर्वशा शेंडे यांचा सत्कार करण्यात येणार आहे. तुषार शेळकेने रिकर्व्ह प्रकारात आशियाई क्रीडा स्पर्धेत भारताला सांघिक रौप्य पदक जिंकून दिले आहे. त्याचप्रमाणे मानव जाधव, कुमकुम मोहोड, यशदीप भोगे, मधुरा धामणगांवकर व पुर्वशा शेंडे यांनीही सातत्याने आंतरराष्ट्रीय स्पर्धा, विश्वचषकात पदकांची कमाई केली आहे. झारखंड, मणिपूर येथील स्पर्धेसाठी संघ निवड निवड समिती निरीक्षण करून महाराष्ट्र राज्याच्या १७ व १९ वर्ष मुले व मुलींच्या संघाची निवड करतील. महाराष्ट्र राज्याचा संघ २० डिसेंबर रोजी सायंकाळी घोषित करण्यात येणार आहे. निवड झालेल्या संघातील खेळाडू झारखंड व मणिपूर येथे होणाऱ्या ६९व्या राष्ट्रीय शालेय धनुर्विद्या क्रीडा स्पर्धेत प्रतिनिधित्व करतील. प्रथम, द्वितीय, तृतीय क्रमांक प्राप्त करणाऱ्या खेळाडूंना मेडल्स व प्राविण्य प्रमाणपत्रे. सर्व सहभागी खेळाडूंना स्पर्धा सहभाग प्रमाणपत्रे वितरीत करण्यात येणार आहे.
