खऱ्या भक्तीचा मार्ग दाखविणारे श्री संत गाडगेबाबा हे चालते-बोलते विद्यापीठ:पुण्यतिथी महोत्सवादरम्यान पंकज महाराज पोहोकार यांचे निरुपण

कोणतेही अवडंबर न करता एक गाडगं, एक काठी, कानात कवडी व अंगावर चिंध्या पांघरुण या समाजाला अंधश्रद्धेच्या खाईतून काढून ख-या भक्तीचा मार्ग दाखविणारे श्री संत गाडगेबाबा हे चालते-बोलते विद्यापीठ होते, अशी माहिती हभप पंकज महाराज पोहोकार यांनी त्यांच्या किर्तनातून मांडली. श्री संत गाडगेबाबा यांचा ६९ वा पुण्यतिथी महोत्सव बाबांच्या समाधीस्थळी सुरु आहे. यावेळी सादर झालेल्या प्रथम कीर्तनसेवेत हभप पंकज महाराज पोहोकार यांनी गाडगेबाबांबाबत अभ्यासपूर्ण विवेचन केले. त्यांच्या मते आज देवाला सुद्धा आदर्श माणसाची गरज आहे. डॉक्टर, वकील, इंजिनिअर होणे सोपे झाले, पण माणूस होणे कठीण झाले आहे. यावेळी त्यांनी कविश्रेष्ठ सुरेश भट यांची एक कविताही सादर केली. ती अशी, गर्दीत माणसाच्या माणूस शोधतो मी.. कोलाहलात माणसाच्या माणूस शोधतो मी, ही देव देवळे सारी फिरून आलो.. भिंतीपल्याड त्यांच्यात माणूस शोधतो मी. महाराजांच्या सांगण्यानुसार गाडगेबाबांचे किर्तन हे उत्तम, आदर्श, सुसंस्कृत माणूस बनवण्याचा कारखाना आहे. स्वछता, देव ,धर्म, अंधश्रद्धा, रूढी आणि माणूस हे विषय त्यांच्या जीवनातील अविभाज्य घटक आहे. देवधर्म व देवधर्म सांभाळा हा काळाचा इशारा आहे. म्हणून गोपाला गोपाला देवकी नंदन गोपाला हे ईश्वर स्मरणच आजच्या तरुण पिढीला व समाजाला वाचवू शकते, असेही पोहोकार महाराज यांनी सांगितले. दरम्यान गाडगे महाराज पुण्यतिथी महोत्सवाचा दुसरा दिवसदेखील पुरणपोळीने साजरा झाला. अंध, अपंग, निराश्रित वृद्धांना जेवन वितरित करण्यात आले. आश्रयदाते कुऱ्हे आप्पाजी यांच्या स्मृतिप्रीत्यर्थ हे अन्नदान करण्यात आले. संस्थेचे विश्वस्त तथा गाडगे महाराज मिशन मुंबईचे उपाध्यक्ष बापूसाहेब देशमुख यांच्यासह संस्थेचे सागर देशमुख, भरतभाऊ रेडे, व्यवस्थापक प्रकाश महात्मे, किशोर चौधरी, सुधीर धोंगडे, विठ्ठल तेलमोरे, अतुल रेडे, गजानन देशमुख आदींनी परिश्रम घेतले. काळमेघ यांनी दिली भेट श्री संत गाडगे महाराज पुण्यतिथी उत्सवाच्या आजच्या तिसऱ्या दिवशी श्री शिवाजी शिक्षण संस्थेच्या कार्यकारी परिषदेचे सदस्य हेमंतराव काळमेघ यांनी आपल्या सहकाऱ्यांसह गाडगे बाबांच्या समाधिस्थळी भेट दिली. यावेळी सर्वांनी समाधीचे दर्शन घेतले. सर्वप्रथम हेमंतराव काळमेघ यांच्या हस्ते गाडगे बाबांच्या प्रतिमेचे पूजन तथा पुष्पहार अर्पण करण्यात आला. याप्रसंगी चंद्रशेखर खेडकर, प्रकाश गवळी, डॉ. ए टी देशमुख, संदीप पुंडकर, प्रभजीतसिंह बछेर, प्रा. डॉ. स्वप्निल देशमुख आदी मान्यवरही उपस्थित होते.