ज्ञानेश्वर आवारी झरी जामणी
झरी जामणी : पानी फाउंडेशन, कृषी विभाग व संपूर्ण महाराष्ट्र उमेद अभियान यांच्या संयुक्त विद्यमाने सुरु असलेल्या सत्यमेव जयते फार्मर कप स्पर्धेच्या अनुषंगाने झरी जामणी तालुक्यातील शेतकऱ्यांचे तीन दिवसीय निवासी प्रशिक्षण नुकतेच पार पडले. दिनांक 19 ते 21 जानेवारी 2026 दरम्यान महारोगी सेवा समिती, आनंदवन (वरोरा) येथे या प्रशिक्षणाचे आयोजन करण्यात आले होते.
या प्रशिक्षणात झरी जामणी तालुक्यातील 37 गावांमधील 47 शेतकऱ्यांनी सहभाग घेतला. पानी फाउंडेशन अंतर्गत आयोजित या प्रशिक्षणामध्ये शेतातील खर्च कसा कमी करावा, उत्पादनात वाढ कशी साधावी, रासायनिक व विषारी औषधांचा वापर कमी करून जैविक कीटकनाशकांचा उपयोग, तसेच शास्त्रशुद्ध व जैविक पद्धतीने शेती कशी करावी याबाबत सविस्तर मार्गदर्शन करण्यात आले.
शेतकऱ्यांचा उत्साह वाढवण्यासाठी पांढरकवडा उपविभागाचे उपविभागीय कृषी अधिकारी श्री. नींगोट, तालुका कृषी अधिकारी श्री. दासरवार, मंडळ कृषी अधिकारी श्री. इंगोले, श्री. पवार तसेच उपकृषी अधिकारी श्री. मोघे यांनी उपस्थित राहून मार्गदर्शन केले. कमी खर्चात आधुनिक शेती तंत्रज्ञान आत्मसात करून शाश्वत शेतीकडे वाटचाल करण्याचे आवाहन त्यांनी यावेळी केले.
या प्रशिक्षणाचे नियोजन कृषी विभागाचे सहायक कृषी अधिकारी श्री. राजु राजुरकर व पानी फाउंडेशनचे क्षेत्र अधिकारी श्री. राजु कांबळे यांनी केले. प्रशिक्षणामुळे शेतकऱ्यांना नव्या शेती तंत्रज्ञानाची ओळख होऊन आत्मविश्वास वाढल्याची भावना सहभागी शेतकऱ्यांनी व्यक्त केली.