वडील नसल्याची जाणीव भासू दिली नाही:धनंजय मुंडेंना अश्रू अनावर, कॉलवर बोलताना ढसा-ढसा रडले

महाराष्ट्राचे उपमुख्यमंत्री अजित पवार यांचे विमान अपघातात निधन झाले आहे. या अनपेक्षित घटनेने संपूर्ण राज्यात हळहळ व्यक्त केली जात आहे. अजित दादांचे निकटवर्तीय समजले जाणारे आमदार धनंजय मुंडे यांना अश्रू अनावर झाल्याचे पाहायला मिळाले. धनंजय मुंडे गाडीत बसून कॉलवर बोलताना त्यांना शब्द फुटत नसल्याचे पाहायला मिळाले. माझ्या सारख्याल वडील नाहीत याची कधी जाणीव नाही होऊ दिली, अशा भावना त्यांनी बोलून दाखवल्या. पुढे त्यांना बोलताही आले नाही, इतके त्यांना अक्षरशः रडू कोसळल्याचे पाहायला मिळाले. धनंजय मुंडे यांच्यासह सर्वज राष्ट्रवादी कॉंग्रेसच्या नेत्यांना अश्रू अनावर झाले आहेत. राष्ट्रवादी कॉंग्रेसचे आमदार प्रतापराव चिखलीकर यांना देखील अश्रू अनावर झाले होते. तसेच राष्ट्रवादीचे ज्येष्ठ नेते हसन मुश्रीफ यांनी अजित दादा म्हणत अश्रूंना वाट मोकळी केली. बारामती येथील वैद्यकीय महाविद्यालयाच्या बाहेर कार्यकर्त्यांनी प्रचंड गर्दी केली असून एकच आक्रोश पाहायला मिळत आहे. अजित दादांची एक झलक पाहण्यासाठी कार्यकर्ते जमण्यास सुरू झाले आहेत. ‘आमचे दादा आम्हाला परत द्या’ आजूबाजूच्या गावातील हजारो नागरीक व कार्यकर्ते बारामती शहराच्या दिशेने येत आहेत. वैद्यकीय महाविद्यालयाच्या बाहेर कार्यकर्त्यांचा मोठा ताफा जमा झाले असून, आमचे दादा आम्हाला परत द्या, अशा आर्त हाका मारताना धाय मोकलून रडताना दिसत आहेत. पोलिसांनी परिस्थिती नियंत्रणात ठेवण्यासाठी शहरात मोठा पोलिस बंदोबस्त तैनात करण्यात आला आहे. दादांच्या अकाली निधनाने मोठे नुकसान झाले- अनिल देशमुख राज्याचे माजी गृहमंत्री अनिल देशमुख यांना अजितदादांच्या निधनाची बातमी समजली. तेव्हा त्यांना सुद्धा अश्रू अनावर झाले. त्यांनी दादांसोबत काम केलेल्या अनेक आठवणी माध्यमांशी बोलताना शेअर केल्या. दादांच्या अकाली निधनाने मोठे नुकसान झाले असून, ते भरून निघणारे नाही, अशी प्रतिक्रिया दिली. ही बातमी आम्ही अपडेट करत आहोत