बातमी ऐका (Marathi Voice Reader)
सामाजिक कार्यकर्त्या अंजली दमानिया यांनी पुणे भूखंड घोटाळ्याप्रकरणी दिवंगत उपमुख्यमंत्री अजित पवार यांचे सुपुत्र पार्थ पवार यांच्यावर तत्काळ गुन्हा दाखल करण्याची मागणी केली आहे. अजित पवारांच्या निधनानंतर अवघ्या 3 दिवसांत शपथविधी घ्यायला हरकत नसेल, तर पुणे भूखंड घोटाळ्याची चौकशीही थांबवायची नाही, असे त्या म्हणाल्यात. धनंजय मुंडेंसारखा संधीसाधू माणूस सुनेत्रा पवारांच्या मागेपुढे फिरताना दिसल्याची बाबही त्यांनी यावेळी निदर्शनास आणून दिली. उपमुख्यमंत्री अजित पवार यांचे गत बुधवारी विमान अपघातात निधन झाले. त्यांच्या निधनानंतर अवघ्या 3 दिवसांतच त्यांच्या पत्नी सुनेत्रा पवार यांनी उपमुख्यमंत्रीपदाची सूत्रे हाती घेतली. या प्रकरणी सकारात्मक व नकारात्मक या दोन्ही प्रकारच्या चर्चा होताना दिसून येत आहेत. या पार्श्वभूमीवर अंजली दमानिया यांनी पार्थ पवार यांच्यावर तत्काळ गुन्हा दाखल करण्याची मागणी केली आहे. त्या रविवारी एका पोस्टमध्ये म्हणाल्या, अजित पवारांच्या निधनानंतर अवघ्या ३ दिवसांत शपथविधी घ्यायला काहीच हरकत नसेल आणि “बिझनेस अज यूज्युअल” असेल, तर पुणे जमीन घोटाळ्याची चौकशीही थांबवायची नाही. 1. पार्थ पवारांविरोधात प्रलंबित FIR तात्काळ दाखल करा.
2. खारगे आयोगाचा अहवाल त्वरित सार्वजनिक करा. पार्थ पवारांवर चौकशी सुरू असताना राज्यसभेचे खासदार बनवणे चुकीचे आहे, असे त्या म्हणाल्या. सुनेत्रा पवारांमागे धनंजय मुंडेंसारखे संधीसाधू अंजली दमानिया यांनी यावेळी सुनेत्रा पवारांच्या मागे संधीसाधू नेते मागेपुढे करत असल्याचाही आरोप केला आहे. या प्रकरणी त्यांनी माजी मंत्री धनंजय मुंडे यांच्यावर निशाणा साधला. धनंजय मुंडेंही सुनेत्रा पवारांच्या पुढे मागे फिरताना दिसले. संधीसाधू माणूस. परत येण्याची तडफड दिसतेय, असे त्या म्हणाल्या. धनंजय मुंडे यांना संतोष देशमुख हत्या प्रकरणामुळे आपल्या मंत्रिपदाचा राजीनामा द्यावा लागला होता. या प्रकरणात धनंजय मुंडे यांचा उजवा हात मानल्या जाणाऱ्या वाल्मीक कराडला अटक करण्यात आली आहे. पार्थ पवारांवर भूखंड घोटाळ्याचा आरोप पार्थ पवार यांच्यावर पुण्यातील मुंढवा – कोरेगाव पार्क परिसरातील 1800 कोटींचा भूखंड अवघ्या 300 कोटींत खरेदी केल्याचा आरोप आहे. ही जमीन पार्थ पवारांच्या अमेडिया यांच्या कंपनीने खरेदी केली होती. या प्रकरणी शितल तेजवानी व दिग्विजय पाटील यांच्यावर गुन्हा दाखल करण्यात आला आहे. पण पार्थ पवार यांच्यावर अद्याप कोणतीही कारवाई झाली नाही. पण आता अंजली दमानिया यांनी पुन्हा एकदा या प्रकरणाला हात घातला आहे.
