बातमी ऐका (Marathi Voice Reader)
सेनगाव तालुक्यातील भानखेडा येथे शेतात नांगरणीचे काम करीत असतांना अचानक विज अंगावर पडल्याने एका तरुण शेतकऱ्याचा मृत्यू झाल्याची घटना सोमवारी ता. 25 रात्री घडली आहे. जगन सिताराम कोटकर (35) असे मयत शेतकऱ्याचे नांव असून या घटनेमुळे भानखेडा गावावर शोककळा पसरली आहे. याबाबत महसूल विभागाच्या सुत्रांनी दिलेल्या माहितीनुसार, भानखेडा येथील जगन कोटकर यांना भानखेडा शिवारात सुमारे दोन एकर शेत आहे. सध्या पेरणीपूर्व मशागतीची कामे सुरु असून दुपारच्या वेळी ऊन्हाचा कडाका असल्याने सायंकाळच्या वेळी काडीकचरा वेचणी व इतर कामे केली जात आहेत. त्यानुसार जगन कोटकर व त्यांच्या सोबत नागोजी कोटकर, रामकिसन कोटकर हे सोमवारी सायंकाळी शेतात कामासाठी गेले होते. शेतात नांगरणीचे काम सुरु केले होते. दरम्यान, सायंकाळच्या सुमारास अचानक वादळी वाऱ्यासह विजेचा कडकडाट सुरु झाला. यावेळी शेतात काम करीत असलेल्या जगन यांच्या अंगावर विज कोसळल्याने त्यांचा जागीच मृत्यू झाला. मात्र सुदैवाने नागोजी व रामकिसन हे दूर अंतरावर असल्याने त्यांना विजेची झळ बसली नाही. या घनटेची माहिती मिळाल्यानंतर गावकऱ्यांनी घटनास्थळी धाव घेतली. तहसीलदार सखाराम मांडवगडे यांनीही महसूल विभागाचे पथक पाठविले तर सेनगाव पोलिस ठाण्याचे सहाय्यक पोलिस निरीक्षक दीपक मस्के, जमादार सुभाष चव्हाण, जीवन मस्के यांच्या पथकाने घटनास्थळी जाऊन पाहणी केली. दरम्यान, मयत जगन यांचा मृतदेह उत्तरीय तपासणीसाठी सेनगाव येथील ग्रामीण रुग्णालयात दाखल करण्यात आला आहे. या घटनेमुळे भानखेडा गावावर शोककळा पसरली आहे. मयत शेतकरी जगन कोटकर यांच्या पश्‍चात आई, पत्नी, एक मुलगा, भाऊ असा परिवार आहे.
