बातमी ऐका (Marathi Voice Reader)
बॉलिवूड अभिनेत्री दीपिका पादुकोणच सध्या पुन्हा एकदा चर्चेत आली आहे. मुंबईतील वाढत्या प्रदूषणाच्या पार्श्वभूमीवर तिने सोशल मीडियावर एक पोस्ट शेअर करत शहरातील परिस्थितीबद्दल चिंता व्यक्त केली आहे. मुंबईतील हवेची गुणवत्ता सतत खालावत असल्याने नागरिकांना, विशेषतः लहान मुलांना श्वास घेण्यास त्रास होत असल्याचे तिने नमूद केले. या परिस्थितीकडे लक्ष वेधत तिने महापालिका प्रशासनाने तातडीने हस्तक्षेप करून योग्य पावले उचलावीत, असे आवाहन केले आहे. दीपिका पादुकोणने आपल्या इन्स्टाग्राम स्टोरीद्वारे ही चिंता व्यक्त केली. तिने मुंबईतील हवेच्या गुणवत्तेचा एक स्क्रीनशॉट शेअर केला असून त्यामध्ये हवेचा निर्देशांक (AQI) 150 च्या पुढे गेल्याचे दिसत आहे. हा स्तर आरोग्यासाठी धोकादायक मानला जातो. या पोस्टमध्ये तिनेबृहन्मुंबई महानगरपालिकेला टॅग करत शहरातील प्रदूषणाबाबत तातडीने चौकशी आणि उपाययोजना करण्याची विनंती केली आहे. मुंबईत राहणारे लोक, विशेषतः लहान मुले, खराब हवेच्या गुणवत्तेमुळे गुदमरत आहेत. हे कसं योग्य असू शकतं? असा प्रश्नही तिने उपस्थित केला. दरम्यान, मुंबईतील वाढत्या प्रदूषणाबाबत आवाज उठवणारी दीपिका ही एकमेव अभिनेत्री नाही. याआधी अभिनेत्री रिचा चढ्ढा आणि सैयामी खेर यांनी देखील सोशल मीडियावर पोस्ट करत मुंबईच्या खालावत चाललेल्या हवेच्या गुणवत्तेबद्दल चिंता व्यक्त केली होती. शहरात वाढणारी धूळ, बांधकामे आणि वाहतुकीमुळे प्रदूषणाची समस्या गंभीर बनत असल्याचे अनेकांनी अधोरेखित केले आहे. ‘किंग’ या चित्रपटात दिसणार दीपिका पादुकोणच्या कामाबद्दल बोलायचे झाल्यास, ती लवकरच शाहरुख खानच्या पुढच्या ‘किंग’ या चित्रपटात दिसणार आहे. सुहाना खान, अभिषेक बच्चन, अनिल कपूर, जॅकी श्रॉफ, अर्शद वारसी, जयदीप अहलावत आणि राणी मुखर्जीचाही या चित्रपटात समावेश आहे. याशिवाय ती दिग्दर्शक ॲटली यांच्या एका तेलुगू अॅक्शन चित्रपटातही झळकणार असून त्या प्रोजेक्टमध्ये ती अल्लू अर्जुन सोबत मुख्य भूमिकेत दिसणार आहे. त्यामुळे तिच्या आगामी प्रोजेक्ट्सबद्दल चाहत्यांमध्ये उत्सुकता वाढली आहे.
