पांढरकवडा (प्रतिनिधी):- सागर मुडे
करंजी: हिंदवी स्वराज्याचे संस्थापक छत्रपती शिवाजी महाराज यांच्या जयंती निमित्त करंजी येथील स्कायलार्क इंग्लिश मीडियम स्कूलमध्ये १९ फेब्रुवारी रोजी विविध कार्यक्रमांचे आयोजन करण्यात आले होते. रयतेच्या राजाला अभिवादन करण्यासाठी विद्यार्थ्यांनी वकृत्व स्पर्धा आणि वेशभूषा स्पर्धांमधून मोठा उत्साह दाखवला.
कार्यक्रमाची सुरुवात छत्रपती शिवाजी महाराज यांच्या प्रतिमेचे पूजन व दीप प्रज्वलनाने करण्यात आली. यावेळी शाळेच्या मुख्याध्यापिका सौ. मीनल घोटेकर यांनी आपल्या प्रस्ताविकातून उपस्थितांना संबोधित केले. “शाळेत वर्षभर थोर महापुरुषांची जयंती व पुण्यतिथीनिमित्त विविध कार्यक्रमांचे आयोजन केले जाते. अशा उपक्रमांमुळे विद्यार्थ्यांच्या सुप्त कलागुणांना वाव मिळतो.
त्यांच्यातील वक्तृत्व चातुर्य आणि आत्मविश्वास वाढवण्यासाठी हे कार्यक्रम अत्यंत आवश्यक आहेत,” असे विचार त्यांनी मांडले.
वक्तृत्व स्पर्धेमध्ये विद्यार्थ्यांनी महाराजांच्या जीवनावर अतिशय प्रभावी आणि ओघवती भाषणे सादर केली. विशेषतः विद्यार्थिनींनी साकारलेली ‘राजमाता जिजाऊ’ यांची वेशभूषा सर्वांचे आकर्षण ठरली.
तसेच विद्यार्थ्यांनी शिवरायांच्या पोवाड्यांवर आणि शौर्यगीतांवर बहारदार नृत्य सादर करून वातावरण शिवमय केले.
या कार्यक्रमाचे नेटके सूत्रसंचालन प्रणिता मोघे यांनी केले, तर उपस्थितांचे आभार साक्षी होलगीलवार यांनी मानले. या सोहळ्याला शाळेतील शिक्षक, कर्मचारी, मोठ्या संख्येने विद्यार्थी आणि पालक उपस्थित होते.
