एकुलत्या एक मुलाच्या निधनाने कोरले कुटुंबावर शोककळा
सुरेश पाचभाई | मारेगाव
मारेगाव येथील वॉर्ड क्र. १२ परिसरात राहणाऱ्या २२ वर्षीय अभियांत्रिकीच्या विद्यार्थ्याने राहत्या घरी गळफास घेऊन आत्महत्या केल्याची धक्कादायक घटना रविवारी (दि. २२) दुपारी साडेतीन वाजताच्या सुमारास उघडकीस आली. या घटनेमुळे परिसरात हळहळ व्यक्त होत असून तालुक्यात शोककळा पसरली आहे.
22-year-old engineering student commits suicide by hanging in Maregaon
संकेत शशिकांत कोरले असे मृत विद्यार्थ्याचे नाव आहे. तो यवतमाळ येथील एका अभियांत्रिकी महाविद्यालयात शिक्षण घेत होता. रविवारी दुपारी घरातील सदस्य काही कामानिमित्त बाहेर गेले असताना संकेतने राहत्या घरातील छताच्या पंख्याला बेडशीटच्या सहाय्याने गळफास घेतल्याचे समोर आले.
काही वेळाने ही बाब निदर्शनास येताच परिसरात एकच खळबळ उडाली. घटनेची माहिती मिळताच मारेगाव पोलिसांनी तत्काळ घटनास्थळी धाव घेत पंचनामा केला. मृतदेह उत्तरीय तपासणीसाठी मारेगाव येथील ग्रामीण रुग्णालयात पाठविण्यात आला आहे.संकेतच्या कुटुंबाची परिस्थिती अत्यंत हलाखीची असल्याची माहिती मिळते.
काही वर्षांपूर्वी त्याच्या वडिलांचे अल्पशा आजाराने निधन झाले होते. त्यानंतर आईने मजुरी व शेतीकाम करून संकेत आणि त्याच्या बहिणीचे शिक्षण सुरू ठेवले. संकेत हा कुटुंबातील एकुलता एक मुलगा असल्याने आई व बहिणीचा मोठा आधार होता. त्याची धाकटी बहीण उमरी येथे नर्सिंगचे शिक्षण घेत आहे.संकेतने हे टोकाचे पाऊल का उचलले, याचे नेमके कारण अद्याप समजू शकलेले नाही. या प्रकरणाचा पुढील तपास मारेगाव पोलीस करीत आहेत.
दरम्यान, मारेगाव तालुक्यात वाढत्या आत्महत्यांच्या घटनांमुळे चिंतेचे वातावरण निर्माण झाले आहे. मात्र या पार्श्वभूमीवर जिल्हा प्रशासनाकडून प्रभावी जनजागृती मोहीम राबवली जात नसल्याची खंत नागरिकांकडून व्यक्त होत आहे. एका होतकरू विद्यार्थ्याच्या अकाली निधनाने संपूर्ण तालुक्यावर शोककळा पसरली आहे.
