बातमी ऐका (Marathi Voice Reader)
अजित पवार यांच्या विमान अपघाताच्या चौकशीवरून सध्या राजकीय आरोप-प्रत्यारोप तीव्र झाले आहेत. अशातच आमदार अनिल पाटील यांनी आमदार रोहित पवारांचे नाव न घेता त्यांच्यावर गंभीर निशाणा साधला आहे. अपघाताबद्दल गोपनीयता न बाळगता वेगवेगळे व्हिडिओ आणि सादरीकरण (प्रेझेंटेशन) दाखवून एक प्रकारे दोषींना मदतच केली जात आहे, असा खळबळजनक आरोप अनिल पाटील यांनी केला आहे. अनिल पाटील म्हणाले की, जे कोणी या प्रकरणात दोषी असतील, त्यांना अशा सादरीकरणातून मदत होऊ शकते. त्यापेक्षा रोहित पवारांकडे जी काही माहिती असेल, ती त्यांनी थेट तपास यंत्रणांना द्यावी, जेणेकरून सत्य समोर येईल आणि संबंधितांवर कारवाई करता येईल. आम्ही भाजपसोबत आहोत, दबावाखाली नाही आमदार लवांडे यांच्या टीकेचा समाचार घेताना पाटील म्हणाले की, आम्हाला भाजपला खूश करण्याची कोणतीही गरज नाही. आम्ही एनडीएमध्ये भाजपसोबत आहोत ही वस्तुस्थिती आहे, पण याचा अर्थ असा नाही की आम्ही कोणाच्या दबावाखाली आहोत. अजित पवार हे कधीच कोणाच्या दबावाखाली आले नाहीत आणि ते कोणाला घाबरले नाहीत, आमच्या 4 नेत्यांवर टीका करणाऱ्यांनी सुनेत्रा पवारांना राष्ट्रीय अध्यक्ष करण्यासाठी त्यांनी काय दबावाखाली काम केले का? नाही आम्ही सर्व जण अजितदादांच्या परिवारासोबत निष्ठेने आहोत. डीजीसीएकडून अनियमिततेचा तपास सुरू तपासाबाबत माहिती देताना अनिल पाटील यांनी सांगितले की, बारामती पोलिस ठाण्यात या अपघाताची ‘एडी’ (Accidental Death) दाखल करण्यात आली आहे. विमानातील तांत्रिक दोष शोधण्यासाठी ‘एआयआयबी’ (AAIB) माहिती घेत आहे, तर डीजीसीएकडून अनियमिततेचा तपास सुरू आहे. तर कुठे घातपात झाला का हे शोधण्याचे काम सुद्धा सुरू आहे. आपण जो पर्यंत कन्क्लूजनपर्यंत पोहचत नाही तो पर्यंत गोपनियता ठेवली गेली पाहिजे ती या प्रकरणी ठेवली गेली आहे. यामध्ये अजून कोणी दोषी आहे का? हे अहवालातून आल्यानंतर पुढच्या कायदेशीर प्रक्रिया पार पाडता येतील. ..तर आम्हीच रस्त्यावर उतरू सुनेत्रा पवार यांनी स्वतः उपमुख्यमंत्री देवेंद्र फडणवीस यांच्याकडे या प्रकरणाच्या सखोल चौकशीची मागणी केली असून, सीआयडीचा तपास वेगाने सुरू आहे. जोपर्यंत तपास अंतिम निष्कर्षापर्यंत पोहोचत नाही, तोपर्यंत गोपनीयता पाळणे गरजेचे असल्याचे पाटील यांनी सांगितले. जर अपघाताच्या अंतिम अहवालात काही त्रुटी आढळल्या, तर इतरांच्या आधी आम्हीच रस्त्यावर उतरू, असा इशाराही त्यांनी यावेळी दिला.
