मार्डी येथील घटना
सुरेश पाचभाई मारेगाव
मारेगाव तालुक्यातील मार्डी येथे दि. १ मार्च २०२६ रविवारी सायंकाळी ७ वाजता भीषण अपघात घडून २१ वर्षीय तरुणाचा जागीच मृत्यू झाल्याने परिसरात हळहळ व्यक्त होत आहे. शेतातून काम आटोपून परत येत असताना व्हीफास लावलेला ट्रॅक्टर अचानक पलटी होऊन खोल नालीत कोसळल्याने चालक ट्रॅक्टरखाली दबला गेला.
मृत युवकाचे नाव अभय बंडू येरमे (वय २१, रा. मार्डी, ता. मारेगाव) असे असून तो कष्टकरी कुटुंबातील होता. अभय हा Massey Ferguson कंपनीच्या ट्रॅक्टरने शेतातील काम उरकून मजरा मार्गे गावाकडे परत येत होता.
दरम्यान, महावितरण कार्यालयाजवळील धोकादायक वळणावर ट्रॅक्टरचा अचानक तोल गेला आणि वाहन रस्त्यालगत पलटी होऊन खोल नालीत कोसळले. ट्रॅक्टरखाली दबल्या गेल्याने अभयचा जागीच मृत्यू झाला. अपघाताचा आवाज ऐकून परिसरातील नागरिकांनी घटनास्थळी धाव घेतली; मात्र तोपर्यंत उशीर झाला होता.
घटनेची माहिती मिळताच मारेगाव पोलीस स्टेशन येथील पोलीस पथक घटनास्थळी दाखल झाले. पंचनामा करून मृतदेह उत्तरीय तपासणीसाठी ग्रामीण रुग्णालयात पाठविण्यात आला. संबंधित प्रकरणी अपघाती मृत्यूची नोंद करण्यात आली असून पुढील तपास सुरू आहे.
या दुर्दैवी घटनेमुळे मार्डी गावावर शोककळा पसरली आहे. तरुण, मेहनती आणि कुटुंबाचा आधारस्तंभ असलेल्या अभयच्या आकस्मिक निधनाने गावात शोक व्यक्त केला जात आहे.
