५ एप्रिलपर्यंत ऑनलाइन अर्ज करा
सुरेश पाचभाई मारेगाव
मारेगाव:गावपातळीवर कृषी यांत्रिकीकरणाला गती देण्यासाठी महाराष्ट्र शासनाच्या कृषी विभागाकडून राबविण्यात येणाऱ्या ‘एक गाव, एक कृषी अवजारे बँक’ या महत्त्वाकांक्षी योजनेसाठी महिला शेतकरी बचत गटांना मोठी संधी उपलब्ध झाली आहे. या योजनेचा लाभ घेण्यासाठी पात्र महिला बचत गटांनी ५ एप्रिलपर्यंत ऑनलाईन अर्ज सादर करावेत, असे आवाहन तालुका कृषी अधिकारी कार्यालयाकडून करण्यात आले आहे.
ही योजना नानाजी देशमुख कृषी संजीवनी प्रकल्प (टप्पा – २) अंतर्गत जागतिक बँकेच्या सहाय्याने राबविण्यात येत आहे. मारेगाव तालुक्यातील धामणी, बोरी (खू), मदनापूर, भालेवाडी, मच्छिंद्र, बामर्डा, फेपरवाडा, मार्डी, डोंगरगाव, लाखापूर, चिंचाळा, पाथरी, वरुड, सालेभट्टी, गोंडबुरांडा, पहापळ, डोल डोंगरगाव, कान्हाळगाव (उ), आकापूर, नरसाळा, वनोजादेवी, वडगाव, पिसगाव व पांढरकवडा या गावांचा या योजनेत समावेश करण्यात आला आहे.
या योजनेअंतर्गत गावपातळीवर नोंदणीकृत महिला बचत गटांमार्फत कृषी अवजारे बँक स्थापन करून विविध कृषी यंत्रे व अवजारे शेतकऱ्यांना भाडेतत्त्वावर उपलब्ध करून देण्याची सुविधा निर्माण केली जाणार आहे. त्यामुळे शेतकऱ्यांना कमी खर्चात आधुनिक यंत्रसामग्रीचा वापर करता येणार असून कृषी उत्पादनात वाढ होण्यास मदत होणार आहे.
विशेष म्हणजे या योजनेत कृषी अवजारांच्या एकूण किमतीवर तब्बल ६० टक्के अनुदान शासनाकडून दिले जाणार आहे. त्यामुळे महिला बचत गटांसाठी ही योजना आर्थिकदृष्ट्या लाभदायक ठरणार असून गावात रोजगाराच्या संधीही निर्माण होणार आहेत.
महिला बचत गटांनी या योजनेचा जास्तीत जास्त लाभ घ्यावा, असे आवाहन जिल्हा कृषी अधीक्षक मनोजकुमार ढगे, उपविभागीय कृषी अधिकारी चंदन निघोट तसेच तालुका कृषी अधिकारी दिपाली खवले यांनी केले आहे.