बुलढाण्यात रुग्णालयातून सिलिंडरच लंपास:गॅससाठी रांगा, पण चोरट्याची थेट स्वयंपाकघरावर नजर; रुग्णालयाच्या किचनमधून चोरी

देशभरात गॅस सिलेंडरच्या तुटवड्याबाबत चर्चा सुरू असताना बुलढाणा जिल्ह्यात एक धक्कादायक चोरीची घटना समोर आली आहे. गॅस मिळवण्यासाठी नागरिकांना एजन्सीबाहेर लांबच लांब रांगा लावाव्या लागत असताना एका चोरट्याने थेट रुग्णालयाच्या स्वयंपाकगृहातून भरलेला गॅस सिलिंडर पळवला. बुलढाणा शहरातील क्षयरोग आरोग्यधाम म्हणजेच टीबी रुग्णालयात ही घटना घडली. या प्रकारामुळे परिसरात एकच खळबळ उडाली असून रुग्णालय प्रशासनही सतर्क झाले आहे. मिळालेल्या माहितीनुसार, चोरट्याने रुग्णालयाच्या स्वयंपाकगृहाचा दरवाजा तोडून आत प्रवेश केला. त्या ठिकाणी एकूण सतरा गॅस सिलिंडर ठेवण्यात आले होते. त्यापैकी एक भरलेला सिलिंडर चोरट्याने पळवून नेल्याचे उघड झाले आहे. याशिवाय स्वयंपाकगृहातील काही साहित्यही चोरीला गेल्याची माहिती समोर आली आहे. गॅस सिलेंडरची चोरी झाल्याची माहिती मिळताच परिसरात चर्चा सुरू झाली. या घटनेनंतर काही रुग्णालयांतील कॅन्टीन चालकही सतर्क झाले असून रात्री सुरक्षा वाढवण्याची गरज व्यक्त केली जात आहे. दरम्यान, गॅस पुरवठ्याबाबत राज्यातील काही भागात गोंधळाची परिस्थिती निर्माण झाल्याची तक्रार नागरिकांकडून केली जात आहे. धाराशिव जिल्ह्यात प्रशासनाकडून गॅसचा पुरेसा साठा असल्याचे सांगितले जात असले तरी घरपोच वितरण सेवा बंद झाल्याने नागरिकांना एजन्सीबाहेर जाऊन सिलिंडर घ्यावे लागत आहेत. त्यामुळे अनेक ठिकाणी सकाळपासूनच नागरिकांच्या लांबच लांब रांगा लागल्याचे दिसून येत आहे. गॅसचा तुटवडा नसल्याचा दावा गॅस वितरणात हेराफेरी होत असल्याचाही आरोप काही नागरिकांनी केला आहे. वितरण करणारे कर्मचारी ओळखीच्या लोकांना प्राधान्य देत असल्याची तक्रार करण्यात आली आहे. एजन्सी सुरू होण्यापूर्वीच सकाळी सात वाजल्यापासून नागरिक रांगेत उभे राहत असल्याचे चित्र दिसत आहे. प्रशासनाकडून गॅसचा तुटवडा नसल्याचा दावा केला जात असला तरी नियोजनातील त्रुटींमुळे नागरिकांना अडचणींचा सामना करावा लागत असल्याचे बोलले जात आहे. त्यामुळे गॅस पुरवठ्याच्या व्यवस्थापनावर प्रश्नचिन्ह निर्माण झाले असून नागरिकांमध्ये नाराजी व्यक्त होत आहे.