अजित पवारांप्रमाणेच सुनेत्रा पवारांचा जनता दरबार:महिलांसह नागरिकांच्या तक्रारींवर तात्काळ निर्णय; नागरिकांच्या समस्या ऐकून अधिकाऱ्यांना आदेश

उपमुख्यमंत्री सुनेत्रा अजित पवार सध्या बारामती दौऱ्यावर असून त्यांनी आज सकाळी बारामतीतील ‘सहयोग’ या निवासस्थानी जनता दरबाराचे आयोजन केले होते. अजित पवार यांच्या कार्यपद्धतीप्रमाणेच नागरिकांशी थेट संवाद साधत त्यांच्या अडचणी जाणून घेण्याचा प्रयत्न सुनेत्रा पवार यांनी केला. या दरबारात नागरिकांच्या विविध तक्रारी ऐकून घेण्यात आल्या आणि अनेक प्रश्नांवर तात्काळ निर्णय घेण्याच्या सूचना प्रशासनाला देण्यात आल्या. विशेषतः महिलांच्या समस्या आणि ‘मुख्यमंत्री माझी लाडकी बहीण’ योजनेशी संबंधित अडचणी सोडवण्यावर त्यांनी विशेष लक्ष केंद्रित केले. सकाळी पावणे नऊ वाजल्यापासूनच सहयोग सोसायटी परिसरात नागरिकांची मोठी गर्दी दिसून आली. बारामती तालुक्यातील विविध गावांमधून अनेक नागरिक आपल्या समस्या मांडण्यासाठी आले होते. यामध्ये महिलांची संख्या विशेषतः जास्त होती. ‘लाडकी बहीण’ योजनेतील अडथळे, स्थानिक नागरी सुविधा, तसेच वैयक्तिक तक्रारी अशा विविध विषयांवर महिलांनी सुनेत्रा पवार यांच्याशी थेट संवाद साधला. प्रत्येक व्यक्तीचे म्हणणे संयमाने ऐकून घेत त्यांनी उपस्थित प्रशासकीय अधिकाऱ्यांना संबंधित प्रश्न तातडीने सोडवण्याच्या सूचना दिल्या. या जनता दरबाराच्या वेळी बारामती वकील संघटनेचे सदस्य देखील सुनेत्रा पवार यांना भेटले. त्यांनी वकिलांच्या व्यावसायिक अडचणींबाबत चर्चा केली आणि काही महत्त्वाच्या मुद्द्यांकडे त्यांचे लक्ष वेधले. नागरिकांच्या समस्या थेट ऐकून घेत त्या तातडीने मार्गी लावण्याचा प्रयत्न होत असल्याने उपस्थितांनी समाधान व्यक्त केले. अनेकांनी या उपक्रमाचे स्वागत करत प्रशासनाशी थेट संवाद साधण्याची ही प्रभावी पद्धत असल्याचे सांगितले. महाराष्ट्र केसरी’ कुस्ती स्पर्धेतील गदेचे पूजन दरम्यान, पुण्यातील वाघोली येथे होणाऱ्या आगामी ‘महाराष्ट्र केसरी’ कुस्ती स्पर्धेच्या आयोजकांनीही या दरबारादरम्यान सुनेत्रा पवार यांची भेट घेतली. स्पर्धेचे औपचारिक निमंत्रण देण्यासाठी ते बारामतीत आले होते. यावेळी सुनेत्रा पवार यांच्या हस्ते स्पर्धेतील मानाची गदा पूजण्यात आली. कुस्ती हा महाराष्ट्राच्या संस्कृतीचा आणि परंपरेचा महत्त्वाचा भाग असल्याचे सांगत त्यांनी या स्पर्धेला शुभेच्छा दिल्या. ग्रामीण भागातील मल्लांना अशा स्पर्धांमुळे मोठे व्यासपीठ मिळते, असे मत व्यक्त करत राज्यातील कुस्ती परंपरेला पुढेही प्रोत्साहन दिले जाईल, असेही त्यांनी आयोजकांना आश्वासन दिले.