१६०५ नागरिकांचा सहभाग; २७११ शासकीय लाभांचे वितरण
सुरेश पाचभाई | मारेगाव
मारेगाव : शासनाच्या योजना थेट जनतेपर्यंत पोहोचविण्याच्या उद्देशाने आयोजित करण्यात आलेल्या ‘श्री छत्रपती शिवाजी महाराज महसूल अभियान शिबीर – टप्पा १’ या उपक्रमाला वानोजादेवी येथे नागरिकांचा अभूतपूर्व प्रतिसाद लाभला. शनिवार (दि.१४ मार्च २०२६) रोजी पार पडलेल्या या शिबिरात तब्बल १६०५ नागरिकांनी उत्स्फूर्त सहभाग नोंदविला, तर १० विविध शासकीय विभागांमार्फत एकूण २७११ लाभांचे वितरण करण्यात आले.
या शिबिराला वणी विधानसभा मतदारसंघाचे आमदार संजय दरेकर यांनी विशेष उपस्थिती लावून नागरिकांशी थेट संवाद साधला. विविध योजनांचा लाभ मिळाल्याने नागरिकांच्या चेहऱ्यावर समाधान दिसून आले. शासन-प्रशासन नागरिकांच्या दारात पोहोचविण्याचा उद्देश या शिबिरातून प्रत्यक्षात उतरल्याची भावना उपस्थित नागरिकांनी व्यक्त केली.
कार्यक्रमाला तहसीलदार उत्तम निलावावाड, गटविकास अधिकारी बी. व्ही. व्हनखंडे, तालुका कृषी अधिकारी दिपाली खवले, तसेच डिमंडताई टोंगे, पुरुषोत्तम बुटे, अविनाश लांबट, देवा बोबडे यांच्यासह विविध विभागांचे अधिकारी-कर्मचारी मोठ्या संख्येने उपस्थित होते. परिसरातील १० ग्रामपंचायतींचे पदाधिकारी व कार्यकर्तेही या कार्यक्रमात सहभागी झाले होते.
विशेष म्हणजे जिल्हा परिषद शाळेतील विद्यार्थ्यांनाही या शिबिरासाठी निमंत्रित करण्यात आले होते. विद्यार्थ्यांनी उत्साहाने सहभाग घेत कार्यक्रमाची शोभा वाढवली.एकाच ठिकाणी विविध शासकीय योजना व सेवा उपलब्ध झाल्याने नागरिकांनी समाधान व्यक्त करत अशा उपक्रमांचे सातत्याने आयोजन व्हावे, अशी अपेक्षा व्यक्त केली. शासनाच्या लोकाभिमुख धोरणाचा हा प्रभावी नमुना ठरल्याची चर्चा परिसरात रंगली.
