बातमी ऐका (Marathi Voice Reader)
भंडारा जिल्ह्यातील लाखांदूर तालुक्यातील मडेघाट फाटा येथे रविवारी रात्री एक भीषण अपघात घडला. दुकानासाठी माल घेऊन परतणाऱ्या एका २५ वर्षीय तरुणाला विरुद्ध दिशेने येणाऱ्या भरधाव दुचाकीने जोरदार धडक दिली. या धडकेत चप्राड येथील मोहन जयप्रकाश शहारे या तरुणाचा जागीच मृत्यू झाला, तर धडक देणारा चालक घटनास्थळावरून पसार झाला आहे. मृतक मोहन शहारे यांचे चप्राड येथे किराणा दुकान आहे. आपल्या व्यवसायासाठी लागणारे साहित्य आणण्यासाठी ते नेहमीप्रमाणे लाखांदूर येथील घाऊक बाजारात गेले होते. १५ मार्च रोजी रात्री ८ वाजेच्या सुमारास त्यांनी माल खरेदी केला आणि गावातीलच एका १७ वर्षीय सहकाऱ्याला सोबत घेऊन ते घराकडे निघाले. रात्री ८:३० च्या सुमारास त्यांची दुचाकी मडेघाट फाटा जवळ आली असता, समोरून (चुकीच्या बाजूने) येणाऱ्या एका अज्ञात दुचाकीने त्यांना जोरदार धडक दिली. ही धडक इतकी भीषण होती की, मोहन यांचा जागीच प्राण गेला. अपघातानंतर मोहन सोबत असलेल्या १७ वर्षीय मुलाने धडक देणाऱ्या चालकाला जाब विचारण्याचा प्रयत्न केला. विरुद्ध दिशेने येऊनही इंडिकेटर किंवा हॉर्न का दिला नाही, असा प्रश्न विचारला असता, संबंधित चालकाने तिथे न थांबता आपल्या दुचाकीसह पळ काढला. रस्त्यावरून जाणाऱ्या प्रवाशांनी तातडीने मोहन यांना लाखांदूर ग्रामीण रुग्णालयात नेले, मात्र डॉक्टरांनी त्यांना ‘मृत’ घोषित केले. केवळ २५ वर्षांच्या कष्टाळू तरुणाचा असा दुर्दैवी मृत्यू झाल्याने चप्राड गावावर शोककळा पसरली आहे. पोलिसांनी या प्रकरणी गुन्हा दाखल केला असून फरार चालकाचा शोध घेतला जात आहे.
