देवाळा येथे भावावर फावड्याने हल्ला; एक गंभीर जखमी
सुरेश पाचभाई | मारेगाव
मारेगाव तालुक्यातील देवाळा येथे सख्ख्या भावाने मोठ्या भावावर फावड्याने जीवघेणा हल्ला केल्याची धक्कादायक घटना शनिवारी सकाळी उघडकीस आली. या प्रकरणी मारेगाव पोलीस ठाण्यात भारतीय न्याय संहिता (BNS) कलम 109 अन्वये गुन्हा दाखल करण्यात आला आहे.
पोलीस सूत्रांकडून मिळालेल्या माहितीनुसार, मोठ्या वडिलांनी दिलेल्या तक्रारीवरून आरोपी सुनिल बाबाराव बावने (वय 30, रा. देवाळा) याच्याविरुद्ध गुन्हा नोंदविण्यात आला आहे. ही घटना 23 मे रोजी सकाळी सुमारे 7 वाजताच्या सुमारास देवाळा येथील राहत्या घरी घडली.आरोपी सुनिल बावने याने त्याचा मोठा भाऊ अनिल बाबाराव बावने (वय 35) याच्यावर फावड्याने डोक्यावर वार करून गंभीर जखमी केले.
हल्ल्यानंतर अनिल बावने हा घरातील हॉलमध्ये रक्तबंबाळ अवस्थेत आढळून आला. ग्रामस्थांच्या मदतीने त्याला तातडीने मारेगाव येथील ग्रामीण रुग्णालयात दाखल करण्यात आले. मात्र प्रकृती गंभीर असल्याने पुढील उपचारासाठी त्याला चंद्रपूर येथे रेफर करण्यात आले आहे.घटनेची माहिती मिळताच मारेगाव पोलिसांनी घटनास्थळी धाव घेत पंचनामा केला.
या प्रकरणाचा पुढील तपास पोलीस निरीक्षक शाम वानखडे यांच्या मार्गदर्शनाखाली सुरू असून हल्ल्यामागील नेमके कारण अद्याप स्पष्ट झालेले नाही. परिसरात या घटनेमुळे खळबळ उडाली आहे.
