बातमी ऐका (Marathi Voice Reader)
ऐतिहासिक वारसा, प्राचीन स्थापत्यकला आणि परिसरातील लाखो भाविकांचे धार्मिक श्रद्धेचे प्रतीक म्हणून ओळख असलेल्या मारेगाव येथील हेमाडपंथी पांडवदेवी मंदिराच्या विकासासाठी आता नव्या कार्यकारिणीने कंबर कसली आहे. अनेक वर्षांपासून निधीअभावी दुर्लक्षित राहिलेल्या या प्राचीन मंदिराला नवसंजीवनी देण्याचा दृढ निर्धार नवनिर्वाचित समितीने व्यक्त केला आहे. मंदिराच्या संपूर्ण जीर्णोद्धारासोबतच या परिसराला अधिकृत ”पर्यटनस्थळाचा” दर्जा मिळवून देण्यासाठी सर्वतोपरी धडपड केली जाईल, अशी ग्वाही कार्यकारिणीकडून देण्यात आली आहे. शेकडो वर्षांचा इतिहास लाभलेल्या पांडवदेवी मंदिराची ओळख परिसरात श्रद्धास्थान म्हणून आहे. मंदिराची हेमाडपंथी शैलीतील रचना, दगडी बांधकाम, कोरीव कलाकुसर आणि पुरातन वास्तुकला पाहण्यासाठी भाविकांसह इतिहासप्रेमीही येथे भेट देतात. मात्र गेल्या काही वर्षांत निधीअभावी योग्य देखभाल व मंदिराची अवस्था जीर्ण होत चालली होती. काही ठिकाणी दगडी बांधकाम खचण्याच्या स्थितीत असून परिसरातील अपुरी सुविधा आणि संरक्षण अभावी मंदिराचे वैभव झाकोळत असल्याची भावना भाविकांनी व्यक्त केली होती. या पार्श्वभूमीवर नव्या कार्यकारिणीची स्थापना करण्यात आली असून मंदिर संवर्धनाला प्राधान्य देत विविध विकासकामांचा आराखडा तयार करण्यात येत आहे. मंदिर परिसर स्वच्छता, दगडी बांधकाम दुरुस्ती, सभामंडप सुशोभीकरण, भाविकांसाठी पिण्याच्या पाण्याची व बसण्याची व्यवस्था, विद्युत रोषणाई, तसेच मंदिर परिसरात हरित वातावरण निर्माण करण्याचे नियोजन करण्यात येत आहे. यासोबतच पुरातत्व विभाग, पर्यटन विभाग तसेच लोकप्रतिनिधी यांच्या माध्यमातून निधी उपलब्ध करून मंदिराला राज्यस्तरीय पर्यटनस्थळ म्हणून विकसित करण्यासाठी प्रयत्न सुरू करण्यात येणार आहेत. मंदिर परिसरात धार्मिक महोत्सव, सांस्कृतिक कार्यक्रम आणि पारंपरिक यात्रा यांना प्रोत्साहन देऊन धार्मिक पर्यटन वाढवण्याचा मानस देखील या नवीन कार्यकारिणीने व्यक्त केला आहे.
