बातमी ऐका (Marathi Voice Reader)
आदिवासी समाजाच्या विविध प्रलंबित आणि ज्वलंत प्रश्नांवर तातडीने तोडगा काढण्यासाठी राष्ट्रीय आदिवासी छात्र संघटनेचे प्रदेशाध्यक्ष गजानन गंडाळे, राष्ट्रीय आदिवासी एकता परिषदेचे दिग्रस तालुका अध्यक्ष रामेश्वर पेंदोर यांनी विधानसभेचे आमदार बाळासाहेब मांगुळकर यांची सदिच्छा भेट घेतली. या भेटीदरम्यान जिल्ह्यातील आदिवासी समाजाच्या सामाजिक, शैक्षणिक, आर्थिक, राजकीय, मूलभूत समस्यांवर अत्यंत सखोल, सकारात्मक चर्चा करण्यात आली. भेटीदरम्यान आदिवासी विद्यार्थ्यांच्या शिष्यवृत्ती, वसतिगृह सुविधा, उच्च शिक्षणातील अडचणी, स्पर्धा परीक्षा मार्गदर्शन केंद्रांची आवश्यकता, युवकांसाठी रोजगार निर्मिती, कौशल्य विकास प्रशिक्षण, स्वयंरोजगारासाठी आर्थिक सहाय्य आदी विषय मांडण्यात आले. तसेच वनहक्क कायद्याची प्रभावी अंमलबजावणी, प्रलंबित दाव्यांचा निपटारा, वनउत्पादनांना योग्य बाजारभाव, आदिवासींच्या पारंपरिक हक्कांचे संरक्षण यावरही चर्चा झाली. आदिवासी महिलांचे सक्षमीकरण, बचत गटांना प्रोत्साहन, आरोग्य सुविधा, मुलींच्या शिक्षणासाठी विशेष योजना, ग्रामीण भागातील रस्ते, पाणीपुरवठा, वीज, आरोग्य केंद्रे, शाळा, अंगणवाड्या व विविध शासकीय योजनांच्या प्रभावी अंमलबजावणीची मागणी करण्यात आली. अनेक पात्र लाभार्थी आजही योजनांपासून वंचित असल्याची बाबही निदर्शनास आणून देण्यात आली. आमदार बाळासाहेब मांगुळकर यांनी समाजाच्या प्रश्नांचे गांभीर्याने ऐकून घेत शासन स्तरावर पाठपुरावा करून न्याय मिळवून देण्यासाठी प्रयत्नशील राहण्याचे आश्वासन दिले. आदिवासी समाजाच्या सर्वांगीण विकासासाठी आवश्यक ते सहकार्य करण्यात येईल, असा विश्वास त्यांनी व्यक्त केला. ही भेट आदिवासी समाजाच्या विकासासाठी, हक्कांसाठी, भावी पिढीच्या उज्ज्वल भविष्यासाठी महत्त्वपूर्ण ठरणार असल्याचा विश्वास गजानन गंडाळे व रामेश्वर पेंदोर यांनी व्यक्त केला.
