गरीब नगरमधील कारवाईचा बदला!:मुंबईला हादरवणाऱ्या मोठ्या दहशतवादी हल्ल्याचा कट उघड; तपासात धक्कादायक माहिती समोर

काही दिवसांपूर्वी मुंबईतील वांद्रे (पूर्व) रेल्वे स्थानकाजवळील गरीब नगर परिसरात महापालिकेने धडक मोहीम राबवत पाच दिवसांत 400 हून अधिक अवैध बांधकामे जमीनदोस्त केली होती. याच अतिक्रमणविरोधी कारवाईचा बदला घेण्यासाठी थेट देशाची आर्थिक राजधानी असलेल्या मुंबईला हादरवून सोडणाऱ्या एका मोठ्या दहशतवादी हल्ल्याचा कट रचण्यात आल्याची अत्यंत धक्कादायक माहिती उघडकीस आली आहे. दिल्ली पोलिसांच्या ‘स्पेशल सेल’ने केलेल्या सखोल तपासात हा भयंकर प्रकार समोर आला आहे. अटक करण्यात आलेल्या संशयित दहशतवाद्यांच्या चौकशीतून अनेक गंभीर आणि धक्कादायक खुलासे समोर आले आहेत. या दहशतवाद्यांच्या रडारवर प्रामुख्याने मुंबई पोलिस, विविध सुरक्षा यंत्रणा आणि शहरातील अतिमहत्त्वाची तसेच सर्वाधिक गर्दीची ठिकाणे होती. पोलिसांवर थेट हल्ला करण्यासोबतच महत्त्वाच्या ठिकाणी मोठे स्फोट घडवून आणत संपूर्ण मुंबईत दहशत माजवण्याचा या संशयितांचा मुख्य उद्देश असल्याचे तपासातून निष्पन्न झाले आहे. हँडलर्ससोबत झालेले चॅट्सही तपास यंत्रणांच्या हाती दिल्ली पोलिसांच्या स्पेशल सेलने अटक केलेल्या संशयित दहशतवाद्यांकडून अत्यंत महत्त्वपूर्ण पुरावे जप्त केले आहेत. आरोपींच्या मोबाईल आणि इतर उपकरणांची तपासणी केली असता, त्यात मुंबईतील अनेक महत्त्वाच्या ठिकाणांचे रेकॉर्ड केलेले व्हिडिओ आणि फोटो आढळून आले आहेत. यावरून दहशतवाद्यांनी शहराची सविस्तर रेकी केल्याचे निष्पन्न झाले आहे. तसेच, परदेशात बसलेल्या त्यांच्या हँडलर्ससोबत झालेले चॅट्सही तपास यंत्रणांच्या हाती लागले असून, त्यातून या कटाची व्याप्ती आणि भीषणता स्पष्ट होत आहे. आयएसआयचा हात असल्याचा संशय या दहशतवादी कटाचे धागेदोरे थेट सीमेपार पोहोचले आहेत. या संपूर्ण कटात पाकिस्तानची गुप्तचर संस्था आयएसआय आणि कुख्यात गुंड मुन्ना झिंगाडा यांच्यासह काही प्रमुख विदेशी सूत्रधारांचा मोठा सहभाग असल्याचा दाट संशय आहे. या परदेशी हँडलर्सच्या थेट इशाऱ्यावरून आणि त्यांनी पुरवलेल्या आर्थिक रसदीवरच मुंबईत हा कट शिजत होता. सध्या तपास यंत्रणा या सर्व मुख्य विदेशी सूत्रधारांच्या भूमिकेचा सखोल तपास करत आहेत. मुंबई पोलिस आणि दहशतवादी पथक हाय अलर्टवर मुंबईत दहशतवादी हल्ला घडवून आणण्याचा हा भयंकर कट उघडकीस आल्यानंतर, मुंबई पोलिस दल आणि महाराष्ट्र दहशतवादविरोधी पथक अत्यंत सतर्क झाले असून त्यांना हाय अलर्टवर ठेवण्यात आले आहे. खबरदारीचा उपाय म्हणून शहरात कडेकोट बंदोबस्त तैनात करण्यात आला असून, प्रत्येक संशयास्पद हालचालीवर करडी नजर ठेवली जात आहे. या दहशतवाद्यांना मुंबईत राहण्यासाठी किंवा रेकी करण्यासाठी स्थानिक पातळीवरून कोणी रसद पुरवली होती का, याचा शोध घेण्यासाठी ‘स्लीपर सेल’ आणि स्थानिक नेटवर्कचीही कसून चौकशी सुरू आहे. दिल्ली स्पेशल सेलच्या या तत्पर कारवाईमुळे सुदैवाने मुंबईवर येऊ पाहणारे एक मोठे संकट टळले आहे.