संगीत:विनायकच्या सुमधुर गायनाने, पवनच्या ‘ तीन ताल तबला’ वादनाने पंढरपूरकर रसिक तृप्त

अभिजात भारतीय शास्त्रीय संगीताची समृद्ध परंपरा आणि चळवळ टिकवून ठेवण्यासाठी सातत्यपूर्ण प्रयत्न करणाऱ्या करकंब नादब्रह्म कला फाउंडेशन आणि आरती साऊंड सिस्टीम, मनमाडकर परिवार यांच्या वतीने एका भव्य शास्त्रीय संगीत मैफिलीचे आयोजन करण्यात आले होते. या सुश्राव्य मैफिलीने पंढरपूर आणि परिसरातील कला रसिक श्रोत्यांना मंत्रमुग्ध केले. कार्यक्रमाची सुरुवात मान्यवरांच्या हस्ते दीपप्रज्वलनाने झाली. यावेळी डॉ. अनिल जोशी, शुभांगी जोशी, डॉ. विनय भोपटकर, शुभांगीताई मनमाडकर, डॉ. प्रसाद कुलकर्णी, आप्पासाहेब चुंबळकर, तसेच आयोजक भगवानभाऊ मनमाडकर आणि ज्ञानेश्वर दुधाणे आदी मान्यवर उपस्थित होते. हा कार्यक्रम यशस्वी करण्यासाठी ज्ञानेश्वर दुधाणे, धनंजय मनमाडकर, भगवानभाऊ मनमाडकर, शुभांगीताई मनमाडकर, संकेत कुलकर्णी, माऊली खरात, वैभव केंगार आदींनी विशेष परिश्रम घेतले. मैफिलीच्या पहिल्या सत्रात आंतरराष्ट्रीय कीर्तीचे ख्यातनाम तबला वादक नयन घोष यांचे शिष्य आणि मुंबईचे युवा तबला वादक पवन सिडाम यांचे स्वतंत्र एकल तबला वादन झाले. त्यांनी ‘ताल तीनताल’ मध्ये अत्यंत तयारीचे कायदे, रेले आणि पारंपरिक बंदिशी सादर करत उपस्थितांची वाहवा मिळवली. त्यांना सतीश भट यांनी हार्मोनियमवर सुंदर लेहरा साथ केली.