सध्या सुरू असलेल्या इंग्रजी माध्यमांच्या शाळांच्या स्पर्धात्मक युगात पालिकेच्या मराठी माध्यमांच्या शाळा आता तग धरुन राहु शकत नाहीत, ही बाब लक्षात आल्याने पालिकेच्या शाळांमधुनही इंग्रजी माध्यमाचे दर्जेदार शिक्षण मिळावे, या उद्देशाने नगर पालिकेच्या काही शाळांमध्ये इंग्रजी माध्यमाचे वर्ग सुरू करण्याचा निर्णय आता घेण्यात आला आहे. त्यामुळे यंदाच्या सत्रामध्ये पालिकेच्या शाळांमधुन विद्यार्थी एबीसीडीचे धडे गिरवताना पाहायला मिळणार आहे. शहरात एकेकाळी पालिकेच्या शाळा आणि या शाळांमधुन शिकणाऱ्या विद्यार्थ्यांची संख्या खूप मोठी होती. मात्र गेल्या काही वर्षांत पालकांचा इंग्रजी माध्यमाच्या शाळांकडे वाढता कल आणि मोठ-मोठ्या शिक्षण संस्थाचालकांनी सुरू केलेल्या इंग्रजी माध्यमाच्या शाळांची झालेली गर्दी यामध्ये पालिकेच्या शाळा मागे पडल्या आहेत. या स्पर्धेमध्ये केवळ मराठी शाळांचा कित्ता गिरवत राहिल्याने पालिकेच्या शाळांमधील विद्यार्थी संख्या झपाट्याने कमी झाली आहे. या शाळांत मिळणाऱ्या शिक्षणाच्या पद्धतीला अपडेट करण्यासंदर्भात पालिकेने कधी विचार केला नसल्याने ही अवस्था झाली आहे. मात्र आता या परिस्थितीवर मात करीत पालिकेच्या शाळांतून इंग्रजी माध्यमाचे शिक्षण विद्यार्थ्यांना उपलब्ध व्हावे, या उद्देशाने पालिकेच्या शाळांमध्ये इंग्रजी माध्यमाचे वर्ग सुरू करण्याचा निर्णय घेण्यात आला आहे. त्यानुसार तहसील चौकातील शाळा क्रमांक २० मध्ये इंग्रजी माध्यमाची वर्ग १ ते १० ची शाळा सुरू करण्यात येणार आहे. त्याची पहिली तुकडी यंदा सुरू होणार आहे. त्याप्रमाणे अंबिकानगर, गांधीनगर, इस्लामपुरा आणि आठवडी बाजारातील शाळांमध्ये सेमी इंग्रजी माध्यमाचे वर्ग सुरू होणार आहे. यासोबतच तहसील चौक, गोधनी मार्ग, अंबिकानगर, इस्लामपुरा आणि आठवडी बाजारातील पालिकेच्या शाळेमध्ये काँन्व्हेन्टचे वर्ग सुरू होणार आहे. त्यामुळे आता पालिकेच्या शाळांमध्येही विद्यार्थ्यांना एबीसीडीचे धडे गिरवण्यास मिळणार आहे. {पालिकेच्या शाळा १५ {वर्गखोल्या १०५ {शिक्षक ८४ {बंद शाळा ३
