बातमी ऐका (Marathi Voice Reader)
महान अकोला शहराला पिण्याच्या पाण्याचा पुरवठा करण्यासाठी महान येथे उभारण्यात आलेल्या दोन जलशुद्धीकरण केंद्रांतून दररोज शहराला लाखो लिटर्स पाणी पुरवले जात आहे. महान धरणातून ग्रॅव्हिटी द्वारे पाणी जलशुद्धीकरण केंद्रातील फाऊंटनमध्ये आणले जाते. सर्वप्रथम पाण्यात तुरटी टाकली जाते. त्यानंतर हे पाणी क्लॅरिफायरमध्ये सोडून गाळ मुक्त केले जाते. फिल्टर प्लांटमध्ये पाणी शुद्ध झाल्यावर त्यात ब्लिचिंग पावडर व आवश्यक प्रमाणात क्लोरिन गॅसचा डोस दिला जातो. हे शुद्ध पाणी पंपांद्वारे अकोला-महान रस्त्यावरील टिटवा फाट्यासमोरील मुख्य जलकुंभात सोडले जाते व तेथून ग्रॅव्हिटी द्वारे संपूर्ण अकोला शहराला वितरित होते. शहरातील विविध जलकुंभांना पुरवठा ६५ एमएलडी फिल्टर प्लांटवरून अकोल्यातील श्रद्धा नगर, केशनगर, आदर्श कॉलनी, तोष्णीवाल लेआउट, महाजनी, रेल्वे स्टेशन, मराठी शाळा, अकोट फैल, खडकी, मलकापूर, गंगानगर, जोगळेकर, लोकमान्य नगर, हरिहर पेठ, नेहरू पार्क, मोठी उमरी आणि लहान उमरी या सर्व जलकुंभांना पाणी पुरवले जाते. तसेच, २५ एमएलडी फिल्टर प्लांटवरून शिवणी, शिवर, आश्रय नगर, शिव नगर व बसस्थानक या जलकुंभांना पाणीपुरवठा केला जातो. पातळी घटल्याने गाळ अधिक उन्हाळ्याचे दिवस पाहता महान धरणाची जलपातळी २३ टक्क्यांखाली आल्याने धरणातून येणाऱ्या पाण्यात गाळ अधिक प्रमाणात आहे. जलशुद्धीकरण केंद्रात त्या पाण्यावर योग्य प्रक्रिया करून पाणी शुद्ध केल्या जाते. शुद्ध झालेले पाणी पंपांद्वारे अकोला शहराला पुरवठा केले जाते, अशी प्रतिक्रीया जलशुद्धीकरण केंद्राचे शाखा अभियंता आशिष भालेराव यांनी दिली. केंद्राची क्षमता व पाणीपुरवठा सध्या केंद्रात ६५ एमएलडी क्षमतेचे सहा पंप असून, त्यापैकी तीन पंपांतून ताशी २५ लाख लिटर्स आणि २५ एमएलडीच्या एका पंपातून ताशी साडेसात लाख लिटर्स पाणी उपसले जात आहे. म्हणजेच दोन्ही फिल्टर प्लांटमधून अकोला शहराला ताशी एकूण ३२.५० लाख लिटर्स पाणीपुरवठा केला जात आहे. सरासरी २४ तासांत ६५ एमएलडी प्लांटमधून ६० एमएलडी,पाणी पुरवले जाते. एकूण नऊ पंपांपैकी सध्या चार पंप कार्यरत असून, तीन पंप स्टँडबाय व दोन पंप नादुरुस्त आहेत. नऊपैकी २ पंप नादुरुस्त; सध्या चारने पुरवठा १. ६५ एमएलडी प्लांट (नवीन इमारत): एकूण सहा पंपांपैकी तीन पंप सुरू आहेत. दोन पंप स्टँडबाय मोडवर ठेवण्यात आले आहेत, तर एक पंप नादुरुस्त आहे. २. २५ एमएलडी प्लांट (जुनी इमारत): एकूण तीन पंपांपैकी एक पंप सुरू आहे. एक पंप स्टँडबाय असून एक पंप नादुरुस्त आहे. म्हणजेच सध्या चार पंपांद्वारे प्रत्यक्ष पाणीपुरवठा सुरू असून थीन पंप आपत्कालीन स्थितीसाठी स्टँडबाय आहेत.
