बातमी ऐका (Marathi Voice Reader)
अंशकालीन स्त्री-परिचारीकांच्या विविध प्रलंबित मागण्यांसाठी आयटक महाराष्ट्र राज्य आरोग्य खाते अंशकालीन ‘स्त्री’-परिचर संघटनेच्या नेतृत्वाखाली सोमवारी १५ जून रोजी जिल्हा आरोग्य अधिकारी यांच्या कार्यालयावर मोर्चा काढण्यात आला. वाढीव मानधनाचा लाभ अद्याप मिळालेला नसल्याने तसेच चार-चार महिने मानधन रखडत असल्याच्या निषेधार्थ जिल्हाभरातील स्त्री-परिचरांनी एकत्र येत प्रशासनाविरोधात तीव्र नाराजी व्यक्त केली. जिल्हा आरोग्य अधिकारी डॉ. सुभाष ढोले यांच्यामार्फत मुख्यमंत्री व आरोग्यमंत्र्यांना निवेदन पाठवले असून, शासनाने १७ मार्च २०२६ रोजी काढलेल्या निर्णयानुसार १ एप्रिलपासून मानधनात तीन हजार रुपयांची वाढ मंजूर करण्यात आली असली तरी, अद्याप वाढीव मानधनाची अंमलबजावणी झालेली नसल्याचा आरोप आंदोलकांनी केला. आरोग्य केंद्रांमध्ये अर्धवेळ कर्मचारी म्हणून नियुक्ती असूनही पूर्णवेळ जबाबदाऱ्या पार पाडाव्या लागत असल्याचे सांगत ‘स्त्री’-परिचरांनी समान कामाला समान वेतन लागू करण्याची मागणी केली. याशिवाय सेवेत कायमस्वरूपी समावेश करण्याची मागणी करण्यात आली आहे. प्रमुख मागण्यांवर भर अंशकालीन स्त्री-परिचरांनी थकीत फरक बिलासह वाढीव मानधनाची अंमलबजावणी, दरमहा नियमित मानधन, सेवेत कायम समावेश, किमान वेतनानुसार वेतनश्रेणी, सामाजिक सुरक्षा व पेन्शन योजना, प्रसूती रजा, सेवा ज्येष्ठतेनुसार पदोन्नती तसेच गणवेश व ओळखपत्रासाठी स्वतंत्र निधी देण्याची मागणी केली. संघटनेने या मागण्यांबाबत शासनाने तातडीने निर्णय घ्यावा, अशी भूमिका घेतली आहे.
